ହାପି ନିଉ ଇୟର

• ଓଡିଆଙ୍କ ପର୍ବ ଭିତରେ ପଶିଗଲା ବିଶ୍ଵସ୍ତରୀୟ ପର୍ବ, ନିଉଇୟର ।

ବହୁ ଦିନୁଁ ଗୋଟିଏ କଥା ମନରେ ଥିଲା। ଆଜି ନୂଆବର୍ଷଟାରେ କହିଦେବାକୁ ମଉକା ଆସିଛି। ଆମେ ତ ଗାଁ ବାଲା। ଆମ ଗାଁରେ ପୋଢୁଆଁ ଅଷ୍ଟମୀ, ମକରସଂକ୍ରାନ୍ତି, ପଣାସଂକ୍ରାନ୍ତି, ଗଣେଶ ପୂଜା, ସରସ୍ୱତୀ ପୂଜା, ଗହ୍ମାପୁର୍ଣମୀ, କୁମାର ପୁର୍ଣମୀ ଆଦି କେତେ ପର୍ବ ତ ପାଳିତ ହେବା ଦେଖିଛୁ। ଆମେ ଖୋଜି ହେଉ, କେବେ ଆସିବ ସେ ପର୍ବ ? ପିଠା, ଖେଚେଡି, ଖିରି ପ୍ୟାଣ୍ଟ ଜାମା ହଳେ ମିଳିବ? ସେ ଦିନ ଗଡି ଗଲା, ଆମେ ଆଗକୁ ବଢି ସହରରେ ପହଞ୍ଚିବା ସଙ୍ଗେ ସଙ୍ଗେ ଆମର ଆଖି ଫିଟିବାକୁ ଲାଗିଲା।
ବଜାରରେ ଦେଖିଲୁ ଗଦା ଗଦା କାର୍ଡ ସାଙ୍ଗକୁ ପୁଳାଏ ଲେଖାଁ ରାଖି, ଟଙ୍ଗାହୋଇଥାଏ କାଚ ଆଲମାରୀ ରେ। କେତେ ଡିଜାଇନର କାର୍ଡ, ବିଦେଶୀ କମ୍ପାନୀ ର ଦାମିକା କାର୍ଡ ରାଖି ସବୁ ଦେଖି ଆଖି ଖୋସି ହୋଇ ଯାଏ। କେବଳ ରାଖି ନୁହେଁ, ସବୁ ଜଣା ଶୁଣା ପର୍ବ ପାଇଁ କାର୍ଡ। ପର୍ବ ନାଆଁ ଆଗରୁ ହାପି ବୋଲି ଇଂଲିସ୍ ରେ ଲେଖା ହୋଇଗଲେ, ତାର ଭାଲ୍ୟୁ ବଢିଲା। ହାପି ରେ କଣ ପେଟ ପୁରେ? ପିଠା ଖଣ୍ଡେ ନାହିଁ କି ମିଠା ଟିଏ ନାହିଁ। ଖାଲି ଶୁଖିଲା ଭକ୍ତି। ସବୁ ପର୍ବ ପାଇଁ କଣ କାର୍ଡ ଅଛି? ଯେମିତି ଚିତଉ ଅମାବାସ୍ୟା, ଶାମ୍ବଦଶମୀ, ଅନନ୍ତ ବ୍ରତ, କବାଟଲେଖା ସଂକ୍ରାନ୍ତି ଯେଉଁ ସବୁରେ ପିଠା ମିଳେ, ସେଥିପାଇଁ କାର୍ଡ ନାହିଁ।

କାର୍ଡ ବଜାରରେ ପଶିଆସିଲା, ଭାଲେଣ୍ଟାଇନ୍ ଡେ, ନିଉ ଇୟର ଡେ , ରାଖି , ବିଜୟା ଦଶମୀ। ଏ ‘ଭାଲେଣ୍ଟାଇନ୍ ଡେ’ ଟା ବହୁତ ପରେ ଆସି , ମାଡିଗଲା ଯେ ଯେତକ ବୁଢା, ମାଷ୍ଟର , ପୁରୁଣା କାଳିଆ ମାଷ୍ଟର ସବୁ ଖାଲି ଟିଙ୍ଗି ଟିଙ୍ଗି ହେଲେ। ପୁଲିସ ଗୋଡେଇଲା , ନିଜକୁ ଚରିତ୍ରର କୋଷ୍ଟଗାର୍ଡ ଭାବି ସବୁ ଛକ, ଗୋଲଗପା, ଦହିବରା ଦୋକାନରେ ଜଗି ରହିଲେ। କିଏ ଗୋଟାଏ ପୁଅ ଝିଅ ଯଦି ସେ ଦୋକାନକୁ ଗଲେ ଖାଇବା ଆଶାରେ, ତାଙ୍କ ପଛରେ ପଡିଗଲେ। ପାର୍କ ରେ ପୁଅଝିଅ ଦିଟା ଯଦି ବସି ଗଲେ, ପାପ ଲାଗିଲା। ସେଥିପାଇଁ ଠେଙ୍ଗା ବାଡି ଧରି ପହଞ୍ଚିଗଲେ, ସ୍ୱୟଂଭୁ ରକ୍ଷକ ଦଳ। “ଚରିତ୍ର ଖରାପ ହୋଇଗଲା?” ଚରିତ୍ର କେମିତି ଖରାପ ହୁଏ ୟାଙ୍କୁ ଜଣା।
ଆଉ ଗୋଟାଏ ପର୍ବ ସହ ଆମର ପରିଚୟ ହେଲା, ରାଖି, ଯାହାକୁ ଆମ ଗାଁରେ କହୁଥିଲେ ଗହ୍ମାପୁର୍ଣମୀ। ସେଦିନକୁ ବଳଭଦ୍ରଙ୍କ ଜନ୍ମଦିନ ରୁପେ ପାଳନ କରୁଥିଲେ। ଗୋରୁଗାଈଙ୍କୁ ଗାଧେଇ, ସିଙ୍ଘ ଓ ଖୁରା ରେ ତେଲ ଲଗାଇ, ଫୁଲମାଳ ପିନ୍ଧାଇ ଭଲ ଖାଇବାକୁ ଦିଆଯାଏ, ପିଠା ଖାଇବାକୁ ଦିଆଯାଏ। ପୁରୋହିତ ନଡ଼ିଆ, ପଇତା ଦେଇ ଯଜମାନଙ୍କୁ ଆଶୀର୍ବାଦ କରନ୍ତି ଓ ଦକ୍ଷିଣା ଗ୍ରହଣ କରନ୍ତି। ହାତରେ ଗୋଟିଏ ନାଲି ସୁତା ବାନ୍ଧି ଦିଅନ୍ତି। ସେହି ପର୍ବର ସମାନ ରାଖିବନ୍ଧନ ରୁପେ ପାଳନ ହୁଏ ଉତ୍ତର ଭାରତୀୟ ରାଜ୍ୟମାନଙ୍କରେ। ଏ ପର୍ବ ବହୁତ ପ୍ରଚାରିତ ହୋଇପାରିଲା। ସେ ସମୟର ଗୋଟିଏ ସିନେମା ରାଖି ର ବହୁ ପ୍ରଦର୍ଶନ ଫଳରେ ସାରା ଦେଶରେ ରକ୍ଷାବନ୍ଧନ ବା ରାଖିବନ୍ଧନ ବହୁତ ଲୋକପ୍ରିୟ ହୋଇଗଲା। ଓଡିଆ ବି ରାଖି ବାନ୍ଧିବା ଆରମ୍ଭ କଲେ। ଯେତେ ନର୍ଥ ଇଣ୍ଡିଆନ ପର୍ବ ଓଡ଼ିଶା ମାଟିକୁ ମାଡି ଆସିଲା। ରାବଣ ପୋଡି, ଛଠପର୍ବ, କାୱର୍ଡ ଯାତ୍ରା, ବମ୍ ଭୋଲେ, କଡୁଆ ଚୌଥ୍ ଆଦି। ଯୁବା ବୟସରେ ଝିଅଟିର ସଙ୍ଗ ଲୋଡୁଥିବା ଯୁବକଟିକୁ ଉତ୍ସାହିତ କଲା ରାଖି। ଲେଡିଜ୍ ହଷ୍ଟେଲରେ ଲାଇନ୍ ଲାଗିଗଲା, ରାଖିବନ୍ଧନ ରୂପ ନେଲା ବିବାହ ବନ୍ଧନରେ। ପରବର୍ତ୍ତୀ ସମୟରେ ସେହିମାନେ ଓଡିଆ ସଂସ୍କୃତି ର ରକ୍ଷକ ରୁପେ ନିଜର ଅଧିକାର ଦାବି କଲେ। ଏହି ପର୍ବଟି ସରକାରୀ ସମର୍ଥନରେ ରାଷ୍ଟ୍ରୀୟ ମାନ୍ୟତା ପାଇପାରିଲା। ମହିଳାମାନଙ୍କୁ ଭାଇହାତରେ ରାଖି ବାନ୍ଧିବାକୁ ବସ୍ ରେ ଫ୍ରି ପାସ ମିଳିଲା। ଫ୍ଲେକ୍ସି ଟାଇମ ଛୁଟି ମିଳିଲା। ପର୍ବର କମର୍ସିଆଲ୍ ଭାଲ୍ୟୁ ବଢିଲା। ରାଖି ର ଓଜନ ବଢିଲା, ମୂଲ୍ୟ ବଢିଲା, ରିଟର୍ଣ ଗିଫ୍ଟ ର ମୂଲ୍ୟ ବଢ଼ିବାରେ ଲାଗିଲା। ଓଡିଆ ମାନେ ମଧ୍ୟ ଗ୍ରହଣ କରିନେଲେ।

ଓଡିଆଙ୍କ ପର୍ବ ଭିତରେ ପଶିଗଲା ବିଶ୍ଵସ୍ତରୀୟ ପର୍ବ ନିଉଇୟର। ଜାନୁଆରୀ ପହିଲା। ଚର୍ଚରେ ଘଣ୍ଟି ବାଜୁ କି ନାହିଁ, ହୋଟେଲରେ ବେଲ୍ ବାଜିଲା। ଅଧ ରାତିରେ ବାର ଖୋଲା ରହିଲା, ଡ୍ୟାନ୍ସ ଫ୍ଲୋରରେ ମ୍ୟୁଜିକ ସହ ଗହଳି ଜମିଲା। ସକାଳୁ ରାସ୍ତାରେ ଗଡି, ନଳାରେ ପଡି, ପଡି ଉଠି ପୁଲିସ ଗାଡିରେ ଟେକାହୋଇ ଆସିଲେ । କେତେକ ଚରିତ୍ରର ଜଗୁଆଳି ବୋଲାଉଥିବା ବ୍ୟକ୍ତି ଲେଖି ଦେଲେ ଏଇଟା କଣ ଓଡିଆ କଲଚର୍ ? ଏଇଟା କଣ ଓଡିଆ ନବବର୍ଷ ? ଆମର ପଣାସଂକ୍ରାନ୍ତି, ଆମର ସୁନିଆ, ଆମ ଗଜପତି ମହାରାଜାଙ୍କ ଅମୁକ ଅଙ୍କେ, ବିକ୍ରମି ସମ୍ବତ। ସେମାନେ ତ ସାରା ବିଶ୍ୱର ରଜା ଥିଲେ। ସେଥିପାଇଁ ସାରା ବିଶ୍ୱ ମାନୁଛି, ଏ ଦିନଟି, ନବବର୍ଷ ରୂପରେ। ଓଡିଆଙ୍କ ଜଗନ୍ନାଥ ମନ୍ଦିରରେ ଭୁବନେଶ୍ୱରିଆ ଙ୍କ ଭିଡ ଦେଖିଛ ଏ ଦିନ? ଜଗନ୍ନାଥଙ୍କୁ କି ସୁନ୍ଦର ବେଶରେ ସଜେଇ ଦେଉଛନ୍ତି। କି ଗହଳି ସମୁଦ୍ର କୂଳରେ! ଦେଶର ପ୍ରଧାନମନ୍ତ୍ରୀ, ରାଷ୍ଟ୍ରପତି ନବବର୍ଷର ଶୁଭେଚ୍ଛା ଦେଉଛନ୍ତି ନା ନାହିଁ? ଆଜି ପରା ମାତା ବୈଷ୍ଣୋଦେବୀ ପୀଠରେ ନିଉଇୟର ଭିଡରେ ବାରଜଣ ମଲେ! ତୁମେ ସେମିତି ହୋ ହୋ ହେଉଥାଅ, କିଏ ପାଳୁଛି ସୁନିଆ, ବଉଳ ଉଆଁସ, କବାଟ ଲେଖା ସଂକ୍ରାନ୍ତି?
ଆମ ରିସର୍ଚ୍ଚ କହେ ଆପଣ ଯାହା କରନ୍ତୁ, ଜଣେ ଅଧେ ବିରୋଧ କରିବା ଅସମ୍ଭବ ନୁହେଁ। ହାପି ନିଉଇୟର କହି ଜଣେ ବନ୍ଧୁ ସମ୍ପର୍କୀୟଙ୍କୁ ମନେ ପକାଇବା କଣ ଦୋଷାବହ?
ଆମେ ଖୋଜି ଖୋଜି ସେଇମାନଙ୍କ ପାଖକୁ ଗଲୁ ଯେଉଁ ମାନେ ନିଉଇୟର ର ବିରୋଧୀ ରୂପେ ନିଜକୁ ପରିଚିତ କରାଉଥିଲେ। ଆଗ ତାଙ୍କୁ ‘ହାପି ନିଉଇୟର’ କହି ସମ୍ଵୋଧନ କରନ୍ତେ, କି ଖୁସି! ବୁଝିଲୁ, ତାଙ୍କ ଗୁଣରୁ କେହି ତାଙ୍କୁ ଶୁଭେଚ୍ଛା ଜଣାଇ ନାହାନ୍ତି। ଛଟପଟ ହେଉଥିଲେ, ମଣିଷ ତ? କିଏ ନଚାହେଁ ଟିକିଏ ସମବେଦନା, ସାନ୍ତ୍ୱନା, ଶୁଭେଚ୍ଛା, ସମ୍ବୋଧନ, ସମ୍ମାନ? ଆମେ ତାଙ୍କୁ ଗୋଟିଏ ଛୋଟ ନିଉଇୟର ପାର୍ଟିକୁ ନିମନ୍ତ୍ରଣ କଲୁ। ଆନନ୍ଦ ସହ ଯୋଗଦାନ କଲେ। ସ୍ମଲ ଡ୍ରିଙ୍କ ଅଫର୍ କରନ୍ତେ, ନାହିଁ ନାହିଁ କହି ସବୁ ପିଇଗଲେ। ସେ ଅବସ୍ଥାରେ ଓଡ଼ିଆ ସଂସ୍କୃତି ମନେ ପକାଇବା ଆମେ ଉଚିତ ମନେ କରି ନାହୁଁ। ସେଇଥିପାଇଁ ଆମେ କହୁ, ହାପି ନିଉ ଇୟର।