ସାହିତ୍ୟ ଜଗତର ସମ୍ବାଦ

Updated on 22 April 2024

କୁଞ୍ଜବିହାରୀ ଦାଶ ସ୍ମାରକୀ ବକ୍ତୃତାମାଳାରେ ସାରସ୍ଵତ ଆଲୋଚନା

ବକ୍ତୃତାମାଳାରେ ମଞ୍ଚାସୀନ ଅତିଥିବୃନ୍ଦ

ସ୍ନାତକୋତ୍ତର ଓଡ଼ିଆ ଭାଷା ଓ ସାହିତ୍ୟ ବିଭାଗ, ରେଭେନ୍ସା ବିଶ୍ଵବିଦ୍ୟାଳୟ, କୁଞ୍ଜବିହାରୀ ସ୍ମୃତି ସଂସଦ ଓ ବିଶ୍ଵଭାରତୀ ପ୍ରାକ୍ତନୀ ଅନୁଷ୍ଠାନମାନଙ୍କର ମିଳିତ ସହଯୋଗରେ ଏପ୍ରିଲ ୨୨ ତାରିଖ ଦିନ ରେଭେନ୍ସା ବିଶ୍ଵବିଦ୍ୟାଳୟ ‘ସେଭେନ୍ ପିଲାର୍ସ ଅଫ ଉଇଜଡ଼ମ୍’ର ଆନେକ୍ସ-୧ ରେ ଦ୍ୱିତୀୟ ଲୋକରତ୍ନ କୁଞ୍ଜବିହାରୀ ଦାଶ ସ୍ମାରକୀ ବକ୍ତୃତାମାଳା ଅନୁଷ୍ଠିତ ହୋଇଯାଇଛି।
ଓଡ଼ିଆ ବିଭାଗର ସଂଯୋଜକ ଜ୍ଞାନୀ ଦେବାଶିଷ ମିଶ୍ର ଏହି କାର୍ଯ୍ୟକ୍ରମରେ ଅଧ୍ୟକ୍ଷତା କରିବା ସହ ସଂଯୋଜନା କରିଥିଲେ। ବିଶିଷ୍ଟ କବି ଓ ସମାଲୋଚକ ସରୋଜ ରଞ୍ଜନ ମହାନ୍ତି ଏହି କାର୍ଯ୍ୟକ୍ରମକୁ ଉଦଘାଟନ କରିଥିଲେ। ଏହି ଅବସରରେ ଅନୁଷ୍ଠିତ ବକ୍ତୃତାମାଳାରେ ପ୍ରଫେସର ବସନ୍ତ କୁମାର ପଣ୍ଡା ‘ଓଡ଼ିଆ ଆତ୍ମକାହାଣୀରେ ମୋ କାହାଣୀ: ଏକ ଅନନ୍ୟ କାହାଣୀ’ ଶୀର୍ଷକ ଭିତ୍ତିପ୍ରବନ୍ଧ ଉପସ୍ଥାପନା କରିଥିଲେ। ସମାଲୋଚକ ଯତୀନ୍ଦ୍ର କୁମାର ନାୟକ ଲୋକରତ୍ନଙ୍କ ଜୀବନୀ ଓ ସାରସ୍ବତ ସାଧନାର ବିଭିନ୍ନ ଦିଗ ସମ୍ପର୍କରେ ଆଲୋଚନା କରିଥିଲେ। ପ୍ରଫେସର ଗିରିଶଚନ୍ଦ୍ର ମିଶ୍ର ଲୋକରତ୍ନଙ୍କ ଉପନ୍ୟାସ ତଥା କବିତା ସମ୍ପର୍କରେ ଆଲୋଚନା କରିଥିଲେ। ଏହି ଉପଲକ୍ଷେ ଦ୍ୱିତୀୟ ଲୋକରତ୍ନ ସ୍ମାରକୀ ବକ୍ତୃତାମାଳା ପୁସ୍ତକ ମଧ୍ୟ ଉନ୍ମୋଚିତ ହୋଇଥିଲା। ସ୍ନାତକୋତ୍ତର ଦ୍ୱିତୀୟ ବର୍ଷର ସୁଲଗ୍ନା ମହାନ୍ତି, ବୈଶାଖୀ ପାତ୍ର ଏବଂ ଗବେଷକ ଶଙ୍ଖଚୂଳ ଦାସ, ଇପସିତା ସାହୁ କୁଞ୍ଜବିହାରୀଙ୍କ ସମ୍ପର୍କରେ ପ୍ରବନ୍ଧ ଉପସ୍ଥାପନ କରିଥିଲେ। କାର୍ଯ୍ୟକ୍ରମର ଅନ୍ତିମ ପର୍ଯ୍ୟାୟରେ କୁଞ୍ଜବିହାରୀଙ୍କ ସମଗ୍ର କୃତି ଥିବା ଏକ ୱେବ୍‌ସାଇଟର ଉନ୍ମୋଚନ କରାଯାଇଥିଲା, ଯାହା ବିଷୟରେ ସବିଶେଷ ତଥ୍ୟ ପ୍ରଦାନ କରିଥିଲେ ଗିରିଶଚନ୍ଦ୍ର ମିଶ୍ର ଏବଂ ଦେବାଶିଷ ଦାସ। ଅଧ୍ୟାପିକା ବିଜୟଲକ୍ଷ୍ମୀ ଦାସ ଅତିଥି ପରିଚୟ ପ୍ରଦାନ କରିଥିଲେ। ପରିଶେଷରେ ବିଭାଗର ଅଧ୍ୟାପକ ଆଶିଷ ସାହୁ କୃତଜ୍ଞତା ଅର୍ପଣ କରିଥିଲେ।

‘ପ୍ରଜାତନ୍ତ୍ର’ର ବିଷୁବ ମିଳନରେ ବିଷୁବ ପୁରସ୍କାର ପାଇଲେ ସୁଲୋଚନା ଦାସ

୭୫ତମ ବିଷୁବ ସମାରୋହ

ପ୍ରଜାତନ୍ତ୍ର ପ୍ରଚାର ସମିତିର ବିଷୁବ ମିଳନ ଏବଂ ବିଷୁବ ସାହିତ୍ୟ ପୁରସ୍କାର ପ୍ରଦାନ ଉତ୍ସବ କଟକସ୍ଥିତ ‘ପ୍ରଜାତନ୍ତ୍ର’ ପରିସରରେ ତିନିଦିନ ବ୍ୟାପୀ ଅନୁଷ୍ଠିତ ହୋଇଯାଇଛି।
ଏହି ସାରସ୍ୱତ ସଭାରେ ବରିଷ୍ଠ କଥାକାର ତଥା ଅବସରପ୍ରାପ୍ତ ପ୍ରାଧ୍ୟାପିକା ଡକ୍ଟର ସୁଲୋଚନା ଦାସଙ୍କୁ ସମିତିର ସର୍ବୋଚ୍ଚ ସମ୍ମାନ, ଚଳିତ ବର୍ଷର ‘ବିଷୁବ ପୁରସ୍କାର’ ପ୍ରଦାନ କରାଯାଇଥିଲା। ଶ୍ରୀମତୀ ଦାସଙ୍କୁ ମାନପତ୍ର, ତାମ୍ରଫଳକ ସହ ଏକଲକ୍ଷ ଟଙ୍କା ପୁରସ୍କାର ରାଶି ପ୍ରଦାନ କରାଯାଇଥିଲା।
ଏପ୍ରିଲ୍ ୧୪ ତାରିଖରେ ଏହି ଉପଲକ୍ଷେ ଅନୁଷ୍ଠିତ ଏକ ମନୋଜ୍ଞ ସାହିତ୍ୟ ସଭାରେ ଅଧ୍ୟକ୍ଷତା କରିଥିଲେ ବିଶିଷ୍ଟ କଥାକାର ଶାନ୍ତନୁ ଆଚାର୍ଯ୍ୟ। ଏଥିରେ ମୁଖ୍ୟ ଅତିଥିଭାବେ ପ୍ରତିଷ୍ଠିତ ମରାଠି ଲେଖକ ବିଶ୍ୱାସ ପାଟିଲ ଯୋଗଦାନ କରିଥିଲେ। ସ୍ବାଗତ ଅଭିଭାଷଣ ପ୍ରଦାନ କରିଥିଲେ ‘ପ୍ରଜାତନ୍ତ୍ର ପ୍ରଚାର ସମିତି’ର ଅଧ୍ୟକ୍ଷ ଭର୍ତ୍ତୃହରି ମହତାବ। ‘ଝଙ୍କାର’ର ସମ୍ପାଦକ ସରୋଜ ରଞ୍ଜନ ମହାନ୍ତି ସମ୍ପାଦକୀୟ ବିବରଣୀ ପାଠ କରିଥିଲେ। ବିଷୁବ ପୁରସ୍କାର ବ୍ୟତୀତ ପ୍ରବନ୍ଧ ଓ ସମାଲୋଚନା ନିମନ୍ତେ ଡକ୍ଟର ଦିଲ୍ଲୀପ କୁମାର ସ୍ବାଇଁ, କବିତା ନିମନ୍ତେ ଶ୍ରୀହରି ଧଳ, ଗଳ୍ପ ନିମନ୍ତେ ସିତେଶ ତ୍ରିପାଠୀଙ୍କୁ ମଧ୍ୟ ଚଳିତ ବର୍ଷର ‘ଝଙ୍କାର ପୁରସ୍କାର’ ପ୍ରଦାନ କରାଯାଇଥିଲା। ଏହି ତିନିଜଣ ପ୍ରତିଭାଙ୍କୁ ମାନପତ୍ର ସହ ୨୫ ହଜାର ଟଙ୍କା ପ୍ରଦାନ କରାଯାଇଥିଲା ସେହିଭଳି ଅନୁବାଦ ପାଇଁ ଜନ୍ମେଜୟ ବାବୁଙ୍କୁ ‘ଝଙ୍କାର ଅନୁବାଦ ଭାରତୀ’ ପୁରସ୍କାରର ମାନପତ୍ର ସହ ୧୦ ହଜାର ଟଙ୍କା ପ୍ରଦାନ କରାଯାଇଥିଲା।
ଏହି ତିନିଦିନିଆ ବିଷୁବ ମିଳନ ଉତ୍ସବ ୧୨ତାରିଖ ଦିନ ଆରମ୍ଭ ହୋଇଥିଲା। ଏହାକୁ ଉଦଘାଟନ କରିଥିଲେ ବିଶିଷ୍ଟ କବି ହରପ୍ରସାଦ ଦାସ। ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ବଙ୍ଗଳା କବି ସୁବୋଧ ସରକାର। ୧୩ ତାରିଖ ଦ୍ୱିତୀୟ ଦିନରେ ପ୍ରଥମ ସମ୍ପାନରେ ‘ଗଦ୍ୟ ସ୍ଥାପତ୍ୟ: ପ୍ରବନ୍ଧ ବିଚିତ୍ରା’ ଶୀର୍ଷକ ଆଲୋଚନାରେ ପ୍ରଫେସର ଆଦିକନ୍ଦ ସାହୁ ସଭାପତିତ୍ବ କରିଥିଲେ ଏବଂ ଡକ୍ଟର ଗୌରାଙ୍ଗ ଚରଣ ଦାଶ, ଡକ୍ଟର ଦିଲୀପ କୁମାର ସ୍ବାଇଁ ଆଲୋଚକ ଭାବେ ଯୋଗ ଦେଇଥିଲେ। ଦ୍ଵିତୀୟ ସମ୍ପାନରେ ସଭାପତିତ୍ବ କରିଥିଲେ ପ୍ରଫେସର ସଂଘମିତ୍ରା ମିଶ୍ର, ଆଲୋଚକ ଭାବେ ଯୋଗ ଦେଇଥିଲେ ପ୍ରଫେସର ସନ୍ତୋଷ ତ୍ରିପାଠୀ, ଡକ୍ଟର ଚିତ୍ତ ପଣ୍ଡା ଏବଂ ଡକ୍ଟର ବିଜୟଲକ୍ଷ୍ମୀ ଦାଶ।

ବଙ୍ଗାଳୀ ନନ୍ଦ ପାଇବେ କେନ୍ଦ୍ର ସାହିତ୍ୟ ଏକାଡେମୀର ଅନୁବାଦ ପୁରସ୍କାର

ବିଭିନ୍ନ ଭାଷାର ଅନୁବାଦକମାନଙ୍କ ପାଇଁ ପୁରସ୍କାର ଘୋଷିତ

କେନ୍ଦ୍ର ସାହିତ୍ୟ ଏକାଡେମୀ ପକ୍ଷରୁ ମାର୍ଚ୍ଚ ୧୧ ତାରିଖ ଦିନ ଇଂରାଜୀ ଓ ୨୩ଟି ଭାରତୀୟ ଭାଷାର ଶ୍ରେଷ୍ଠ ଅନୁବାଦ କୃତି ପାଇଁ ପୁରସ୍କାରମାନ ଘୋଷଣା କରାଯାଇଛି। ଏହା ମଧ୍ୟରେ ବିଶିଷ୍ଟ ଓଡ଼ିଆ ଅନୁବାଦକ ବଙ୍ଗାଳୀ ନନ୍ଦଙ୍କର ‘ନେଲ୍ଲୁରୀ କେଶବସ୍ବାମୀ ଉତ୍ତମା କଥୁଲୁ’ ଅନ୍ତର୍ଭୁକ୍ତ। ନେଲ୍ଲୁରୀ କେଶବସ୍ବାମୀଙ୍କର ଏହି ଶୀର୍ଷକ ଏକ ତେଲଗୁ ଗଳ୍ପ ସଂକଳନକୁ ସେ ଓଡ଼ିଆ ଭାଷାରେ ଅନୁବାଦ କରିଛନ୍ତି।
ଓଡ଼ିଆ ବିଭାଗର ଏହି ପୁରସ୍କାର ନିର୍ଣ୍ଣୟ ପାଇଁ ସାହିତ୍ୟ ଏକାଡେମୀର ବିଚାରକ ମଣ୍ଡଳୀରେ ଥିଲେ ବୈଷ୍ଣବ ଚରଣ ସାମଲ, ବିପିନ ବିହାରୀ ମିଶ୍ର ତଥା ପ୍ରସନ୍ନ କୁମାର ମହାନ୍ତି। ଏଥିପାଇଁ ପ୍ରାରମ୍ଭିକ ପର୍ଯ୍ୟାୟରେ ଯେଉଁ ଅନ୍ୟ ଅନୁବାଦକଙ୍କ କୃତିଗୁଡ଼ିକୁ ବିଚାରକୁ ନିଆଯାଇଥିଲା ସେମାନେ ହେଲେ ସୂର୍ଯ୍ୟ ମିଶ୍ର, କ୍ଷୀରୋଦ ପରିଡ଼ା, କନକମଞ୍ଜରୀ ସାହୁ, ଇନ୍ଦୁଲତା ମହାନ୍ତି, ପ୍ରଦୀପ କୁମାର ରାୟ, ବିଜୟ କୁମାର ପ୍ରଧାନ ଓ ଧରଣୀଧର ନାଥ। ପୁରସ୍କାରଟି ପାଇଁ ମନୋନୀତ ହୋଇଥିବା ଅନୁବାଦକ ବଙ୍ଗାଳୀ ନନ୍ଦ ଏଯାବତ୍ ବିଭିନ୍ନ ଭାଷାରୁ ୧୪ଟି ପୁସ୍ତକ ଓଡ଼ିଆ ଭାଷାକୁ ଅନୁବାଦ କରିସାରିଛନ୍ତି। ସେ ରାୟଗଡ଼ା ଜିଲ୍ଲାର ବାସିନ୍ଦା ତଥା ୨୦୦୫ ମସିହାରେ ଶିକ୍ଷକତାରୁ ଅବସର ଗ୍ରହଣ କରିଛନ୍ତି।

ଶାସ୍ତ୍ରୀୟ ଓଡ଼ିଆ ଭାଷା ଦିବସ ଉପଲକ୍ଷେ ଭୁବନେଶ୍ଵରରେ ଆଲୋଚନା ସଭା

ସାହିତ୍ୟ ଗବେଷଣାର ନୂତନ ଦିଗ ଉପରେ ଆଲୋଚନା

ଭୁବନେଶ୍ବରଠାରେ ଥିବା ଶାସ୍ତ୍ରୀୟ ଓଡ଼ିଆ ଉତ୍କର୍ଷ ଅଧ୍ୟୟନ କେନ୍ଦ୍ର ପକ୍ଷରୁ ମାର୍ଚ୍ଚ ୧୧ ତାରିଖ ଦିନ ସର୍ଦ୍ଦାର ପଟେଲ ହଲ୍ ପରିସରରେ ଶାସ୍ତ୍ରୀୟ ଓଡ଼ିଆ ଭାଷା ଦିବସ ଉପଲକ୍ଷେ ‘ଶାସ୍ତ୍ରୀୟ ଓଡ଼ିଆ ସାହିତ୍ୟ ଗବେଷଣାର ନୂତନ ଦିଗ’ ବିଷୟରେଏକ ଆଲୋଚନା ସଭା ଅନୁଷ୍ଠିତ ହୋଇଯାଇଛି। ଏହି ସମାରୋହରେ ସ୍ବାଗତ ଅଭିଭାଷଣ ଦେଇ ଉତ୍କର୍ଷ କେନ୍ଦ୍ରର ନିର୍ଦ୍ଦେଶକ ଡ. ବସନ୍ତ କୁମାର ପଣ୍ଡା ଭାରତ ସରକାରଙ୍କ ଦ୍ବାରା ଓଡ଼ିଆ ଭାଷାକୁ ଶାସ୍ତ୍ରୀୟ ଭାଷା ଭାବରେ ସ୍ବୀକୃତି ପ୍ରଦାନର ପୃଷ୍ଠଭୂମି ସଂପର୍କରେ ସୂଚନା ଦେଇଥିଲେ। ଆଲୋଚ୍ୟ ବିଷୟ ଉପରେ ଆଲୋକପାତ କରି ସେ କହିଲେ ଯେ ଆମ ସାହିତ୍ୟ ଗବେଷଣାର ନୂତନ ଦିଗ ଉନ୍ମୋଚନ କରିବାରେ ଡିଜିଟାଲ ମାନବ ବିଦ୍ୟାର ଗୁରୁତ୍ବପୂର୍ଣ୍ଣ ଭୂମିକା ରହିଛି। ମୁଖ୍ୟବକ୍ତା ଉତ୍କଳ ସଂସ୍କୂତି ବିଶ୍ବବିଦ୍ୟାଳୟର କୁଳପତି ପ୍ରସନ୍ନ କୁମାର ସ୍ବାଇଁ କହିଲେ ଯେ ଓଡ଼ିଆ କେବେ ହେଁ ଶ୍ରେଣୀକକ୍ଷର ଭାଷା ନଥିଲା। ସେ ଅଭିମନ୍ୟୁ ସାମନ୍ତସିଂହାରଙ୍କ ‘ବିଦଗ୍ଧ ଚିନ୍ତାମଣି’ର ଗୋଟିଏ ଧାଡ଼ି: “ଦିବ୍ୟ ଅଦିବ୍ୟ ଭାଷାରେ ପଦ ହେବ ସିଦ୍ଧି” ଉଦ୍ଧୃତ କରି କହିଲେ ଆମ ଭାଷାର ଦିବ୍ୟତ୍ବର ତୁଳନା ନାହିଁ। ସେ ମଧ୍ୟ କହିଥିଲେ ଯେ ଆମ ସାହିତ୍ୟର ୯୫ ପ୍ରତିଶତ ଭାଗ ସମ୍ପର୍କରେ ଏବେ କେହି ଅବଗତ ନୁହଁନ୍ତି। ମୁଖ୍ୟ ଅତିଥି ବିଶିଷ୍ଟ ଭାଷାବିତ୍ ଦେବୀପ୍ରସନ୍ନ ପଟ୍ଟନାୟକ ଶାସ୍ତ୍ରୀୟ ଓଡ଼ିଆ ଭାଷାର ଉତ୍କର୍ଷ ପ୍ରସଙ୍ଗରେ ନିଜର ଭାବନା ବ୍ୟକ୍ତ କରି କହିଲେ ଯେ ଯଦି ଲେଖା ଓ ଲେଖକ ନଥା’ନ୍ତେ ତେବେ ଆଜି ଆମେ ଶାସ୍ତ୍ରୀୟ ମାନ୍ୟତା ପାଇନଥା’ନ୍ତେ।
ଏହି ଅବସରରେ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ତଥା ଭାରତୀୟ ଭାଷା ସଂସ୍ଥାନର ନିର୍ଦ୍ଦେଶକ ଶୈଳେନ୍ଦ୍ର ମୋହନ ପ୍ରମୁଖଙ୍କଠାରୁ ଆସିଥିବା ଶୁଭେଚ୍ଛାବାର୍ତ୍ତା ପଠନ କରାଯାଇଥିଲା। ସଭାର ଶେଷରେ ଓଡ଼ିଶାର ରାଜ୍ୟ ସଂଗୀତ ‘ବନ୍ଦେ ଉତ୍କଳ ଜନନୀ’ ଗାନ କରାଯିବାରୁ ଦର୍ଶକମଣ୍ଡଳୀ ମଧ୍ୟରେ ବସିଥିବା ନଟବର ଶତପଥୀ ଏହାର ପ୍ରତିବାଦ କରିଥିଲେ, ଏବଂ ସଭାର ଆରମ୍ଭରେ ଏହା ଗାନ କରାଯିବା ଉଚିତ ଥିଲା ବୋଲି କହିଥିଲେ। ଫଳରେ ରାଜ୍ୟ ସଂଗୀତଟିର ପରିବେଷଣ ମଝିରୁ ହିଁ ବନ୍ଦ କରିଦିଆଯାଇଥିଲା।

ସାହିତ୍ୟ ଏକାଡେମୀର ‘ସାହିତ୍ୟୋତ୍ସବ’କୁ ନିମନ୍ତ୍ରିତ ଓଡ଼ିଆ ଲେଖକଙ୍କ ତାଲିକାକୁ ନେଇ ଅସନ୍ତୋଷ

ମନୋନୟନକୁ ନେଇ ହରପ୍ରସାଦ ଦାସଙ୍କ ଆପତ୍ତି

ବିଶ୍ବର ସର୍ବବୃହତ୍ ସାହିତ୍ୟ ଉତ୍ସବ ବୋଲି କୁହାଯାଉଥିବା, କେନ୍ଦ୍ର ସାହିତ୍ୟ ଏକାଡେମୀ ଦ୍ବାରା ନୂଆଦିଲ୍ଲୀରେ ଆସନ୍ତା ମାର୍ଚ୍ଚ ୧୧ରୁ ୧୬ ତାରିଖ ପର୍ଯ୍ୟନ୍ତ ଆୟୋଜିତ ‘ସାହିତ୍ୟୋତ୍ସବ’ରେ ଓଡ଼ିଆ ଭାଷାର ପ୍ରତିନିଧିତ୍ବ କରିବା ପାଇଁ ମନୋନୀତ ସାହିତ୍ୟିକମାନଙ୍କ ତାଲିକାକୁ ନେଇ ବିଶିଷ୍ଟ ଓଡ଼ିଆ କବି ହରପ୍ରସାଦ ଦାସ ଅସନ୍ତୋଷ ପ୍ରକାଶ କରିଛନ୍ତି। ଏହି ସାହିତ୍ୟୋତ୍ସବର ଗୋଟିଏ ଅଧିବେଶନରେ ଅଧ୍ୟକ୍ଷତା କରିବା ପାଇଁ ମନୋନୀତ ହୋଇଥିଲେ ହେଁ ଏଥିରେ ଯୋଗଦେବା ପାଇଁ ନିଜର ଅନିଚ୍ଛୁକତା ଜଣାଇ ସେ ଏକାଡେମୀର କର୍ତ୍ତୃପକ୍ଷଙ୍କୁ ଏକ ଇ-ମେଲ୍ ପଠାଇଥିବା ଜଣାଯାଇଛି। ଏହି ବିଷୟରେ ସୂଚନା ଦେଇ ମାର୍ଚ୍ଚ ୬ ତାରିଖ ଦିନ ନିଜର ଏକ ଫେସବୁକ୍ ପୋଷ୍ଟରେ ଶ୍ରୀ ଦାସ ପ୍ରଶ୍ନ କରିଛନ୍ତି ଯେ ଓଡ଼ିଶାରୁ ମନୋନୀତ ଏହି ସାହିତ୍ୟିକମାନଙ୍କ ମଧ୍ୟରୁ କେତେଜଣଙ୍କୁ ଅବା ସାହିତ୍ୟିକ ଭାବରେ ଲୋକେ ଜାଣନ୍ତି? ଏହି ସନ୍ଦର୍ଭରେ ସେ ଯେଉଁ ତାଲିକା ଉଲ୍ଲେଖ କରିଛନ୍ତି ସେଥିମଧ୍ୟରେ କେତେଜଣ ପ୍ରତିଷ୍ଠିତ ସାହିତ୍ୟିକଙ୍କୁ ଛାଡ଼ି ଅନ୍ୟମାନଙ୍କ ମଧ୍ୟରେ ଅଛନ୍ତି ଆଦ୍ୟାଶା ଦାସ, ସୁଶୀଳ ସ୍ବାଇଁ, ପବିତ୍ର ମୋହନ କର, ଦେବ ପ୍ରସାଦ ଦାଶ, ରଞ୍ଜନ କୁମାର ଦାସ, ରୀତା ନାୟକ, ମୋନାଲିସା ଜେନା, ପ୍ରୀତିଧାରା ସାମଲ, ସୁଜିତ ପଣ୍ଡା, ହିରଣ୍ମୟୀ ମିଶ୍ର, ଶୁଭ୍ରାଂଶୁ ପଣ୍ଡା, ଆଶିଷ ଗଡ଼ନାୟକ, ଶୁଭଶ୍ରୀ ଲେଙ୍କା ଓ କୃଷ୍ଣ ମହାନ୍ତି ପ୍ରମୁଖ। ଏହି ସାହିତ୍ୟୋତ୍ସବରେ ଓଡ଼ିଆ ସାହିତ୍ୟ ଓ ସାହିତ୍ୟିକମାନଙ୍କର ଯଥାର୍ଥ ଉପସ୍ଥିତି ସମ୍ଭବ ହୋଇନାହିଁ ବୋଲି ସେ କହିଛନ୍ତି। ସେ କହିଛନ୍ତି ଯେ ଏଭଳି ବିସଙ୍ଗତି ପୂର୍ଣ୍ଣ ପ୍ରତିନିଧି ଚୟନ ପାଇଁ ସାହିତ୍ୟ ଏକାଡେମୀର କାର୍ଯ୍ୟକାରୀ କମିଟି ତଥା ଓଡ଼ିଆ ଉପଦେଷ୍ଟା ମଣ୍ଡଳୀର ସଦସ୍ୟମାନେ ଏଥିପାଇଁ ଉତ୍ତରଦାୟୀ ଭାବରେ ସର୍ବସାଧାରଣରେ କ୍ଷମା ପ୍ରାର୍ଥନା କରିବା ଉଚିତ। ଏହା ଯଦି ଓଡ଼ିଆ ଉପଦେଷ୍ଟା ମଣ୍ଡଳୀର ଆବାହକଙ୍କର ଅଗୋଚରରେ କରାଯାଇଥାଏ ତେବେ ସେଥିପାଇଁ ସେ ତାଙ୍କର ଇସ୍ତଫା ଦାବି କରିଛନ୍ତି।
ଯାହା ଜଣାଯାଏ, ଗତ ଫେବୃଆରୀ ୧୮ ତାରିଖ ଦିନ ଭୁବନେଶ୍ବରର କଳିଙ୍ଗ ଅଶୋକ ହୋଟେଲରେ ଏକାଡେମୀର ସଚିବ କେ. ଶ୍ରୀନିବାସ ରାଓଙ୍କ ଉପସ୍ଥିତିରେ ଅନୁଷ୍ଠିତ ଓଡ଼ିଆ ଉପଦେଷ୍ଟା ମଣ୍ଡଳୀର ଏକ ବୈଠକରେ ଏହି ସାହିତ୍ୟୋତ୍ସବ କିମ୍ବା ସେଥିପାଇଁ ମନୋନୀତ ହେବାକୁ ଥିବା ଓଡ଼ିଆ ସାହିତ୍ୟିକଙ୍କ ତାଲିକା ସମ୍ପର୍କରେ କୌଣସି ଆଲୋଚନା ହୋଇନାହିଁ। ଏ ସମ୍ପର୍କରେ ‘ସାହିତ୍ୟ ଚର୍ଚ୍ଚା’କୁ ନିଜର ପ୍ରତିକ୍ରିୟା ଦେଇ ସାହିତ୍ୟ ଏକାଡେମୀର ଓଡ଼ିଆ ଉପଦେଷ୍ଟା ମଣ୍ଡଳୀର ଆବାହକ ଡ. ଗୌରହରି ଦାସ କହିଛନ୍ତି ଯେ, ପ୍ରତିଷ୍ଠିତ ସାହିତ୍ୟିକମାନଙ୍କୁ ଛାଡ଼ି କିଛି ନବାଗତମାନଙ୍କୁ ମଧ୍ୟ ସାହିତ୍ୟ ଏକାଡେମୀର ଏଭଳି ବିଭିନ୍ନ କାର୍ଯ୍ୟକ୍ରମଗୁଡ଼ିକୁ ସବୁବେଳେ ଡକାଯାଇଥାଏ, ଯାହାର ଉଦ୍ଦେଶ୍ୟ ହେଲା ସେମାନଙ୍କୁ ସାହିତ୍ୟ ଜଗତ ସହିତ ପରିଚିତ କରାଇବା। ଏଥର ମନୋନୀତ ହୋଇଥିବା ନୂଆ ପ୍ରତିଭାଧରମାନଙ୍କର ଓଡ଼ିଆ ସାହିତ୍ୟକୁ କିଛି ନା କିଛି ଅବଦାନ ରହିଛି ବୋଲି ସେ ପ୍ରକାଶ କରିଛନ୍ତି। ସେ ମଧ୍ୟ କହିଛନ୍ତି ଯେ ଏ ବର୍ଷ ସାହିତ୍ୟ ଏକାଡେମୀର ଏହି ଉତ୍ସବକୁ ପ୍ରାୟ ୬୦ ଜଣ ଓଡ଼ିଆ ସାହିତ୍ୟିକଙ୍କୁ ନିମନ୍ତ୍ରିତ କରାଯାଇଛି, ଯାହାକି ଏ ଯାବତ୍ ସର୍ବାଧିକ। ଏହି ପ୍ରସଙ୍ଗ ଏବେ ଓଡ଼ିଶାର ସାହିତ୍ୟିକ ମହଲରେ ଆଲୋଚନାର ବିଷୟ ପାଲଟିଛି।

ରାଜା ରାମମୋହନ ଲାଇବ୍ରେରୀ ଯୋଜନା ଅଧୀନରେ ସରକାରଙ୍କ ଦ୍ଵାରା ପୁସ୍ତକ କିଣାରେ କଚ୍ଛପ ଗତି

ଆଠ ବର୍ଷ ହେଲା ପୁସ୍ତକ କ୍ରୟ ହୋଇନାହିଁ

ଓଡ଼ିଆ ଲେଖକ ଓ ପୁସ୍ତକ ପ୍ରକାଶକମାନଙ୍କୁ ପ୍ରୋତ୍ସାହିତ କରିବା ତଥା ଲାଇବ୍ରେରୀମାନଙ୍କୁ ଉନ୍ନତ ମାନର ପୁସ୍ତକ ଯୋଗାଇଦେବା ପାଇଁ କେନ୍ଦ୍ର ସରକାରଙ୍କର ଥିବା ‘ରାଜା ରାମମୋହନ ରାୟ ଲାଇବ୍ରେରୀ ଫାଉଣ୍ଡେସନ୍’ ଯୋଜନା ଅଧୀନରେ ଓଡ଼ିଶା ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଦ୍ବାରା ପୁସ୍ତକ କ୍ରୟ କରିବାରେ ଅହେତୁକ ବିଳମ୍ବ ସାଧାରଣରେ ଅସନ୍ତୋଷ ସୃଷ୍ଟି କରିଛି। ପ୍ରାପ୍ତ ସୂଚନାରୁ ଜଣାଯାଏ ଯେ ଏଯାବତ୍ କେବଳ ୨୦୧୫-୧୬ ବର୍ଷ ପର୍ଯ୍ୟନ୍ତ ହିଁ ପୁସ୍ତକ କ୍ରୟ କରାଯାଇପାରିଛି । ୨୦୧୬-୧୭ ଓ ୨୦୧୭-୧୮ ବର୍ଷ ଦ୍ବୟ ପାଇଁ ପୁସ୍ତକ ଚୟନ ହେବାପରେ ଲେଖକ ଓ ପ୍ରକାଶକମାନଙ୍କଠାରୁ ପୁସ୍ତକ ସଂଗ୍ରହ କରାଯାଇଥିଲେ ହେଁ କୌଣସି କାରଣରୁ ସେମାନଙ୍କୁ ଏହାର ପ୍ରାପ୍ୟ ପ୍ରଦାନ କରାଯାଇପାରିନାହିଁ। ଫଳରେ ସଂଗୃହୀତ ପୁସ୍ତକଗୁଡ଼ିକ ରାଜ୍ୟର ବିଭିନ୍ନ ପଞ୍ଜୀକୃତ ଲାଇବ୍ରେରୀଗୁଡ଼ିକୁ ପଠାନଯାଇ ସରକାରଙ୍କ ପାଖରେ ପଡ଼ିରହିଛି। ସ୍ଥାନାଭାବ କାରଣରୁ ଏହି ପୁସ୍ତକଗୁଡ଼ିକ ବର୍ତ୍ତମାନ ଗୁରୁ କେଳୁଚରଣ ଓଡ଼ିଶୀ ଗବେଷଣା କେନ୍ଦ୍ରର ପରିସରରେ ରଖାଯାଇଛି। ପୂର୍ବରୁ ସଂଗୃହୀତ ହୋଇଥିବା ପୁସ୍ତକଗୁଡ଼ିକ ବର୍ଷ ବର୍ଷ ଧରି ଏହିଭଳି ଗଚ୍ଛିତ ରହିବା ଫଳରେ ପରବର୍ତ୍ତୀ ବର୍ଷଗୁଡ଼ିକ ପାଇଁ ଲେଖକ ଓ ପ୍ରକାଶକମାନଙ୍କଠାରୁ ପୁସ୍ତକ ସଂଗ୍ରହ କରିବା ସମ୍ଭବ ହୋଇପାରୁନାହିଁ, ଯଦିଓ ୨୦୨୨-୨୩ ବର୍ଷ ପର୍ଯ୍ୟନ୍ତ ପୁସ୍ତକ ଚୟନ ପ୍ରକ୍ରିୟା ଶେଷ ହୋଇ ଏଥିପାଇଁ ଯୋଗ୍ୟ ବିବେଚିତ ହୋଇଥିବା ପୁସ୍ତକଗୁଡ଼ିକର ତାଲିକା ଘୋଷଣା କରାଯାଇସାରିଛି।
ପ୍ରକାଶ ଥାଉକି ଏହି ଯୋଜନା ଅଧୀନରେ ପୁସ୍ତକ କ୍ରୟ ପାଇଁ କେନ୍ଦ୍ର ସରକାର ରାଜ୍ୟ ସରକାରଙ୍କୁ ୫୦ ପ୍ରତିଶତ ମ୍ୟାଚିଂ ଗ୍ରାଣ୍ଟ ଦେଇଥାଆନ୍ତି। ଯାହା ଜଣାଯାଇଛି, ଓଡ଼ିଶାର ବହୁ ସଂଖ୍ୟକ ଲେଖକ ଓ ପୁକାଶକ ଏହି ଯୋଜନାରେ ପୁସ୍ତକ ସଂଗ୍ରହ ପାଇଁ ସରକାରଙ୍କ ବିଜ୍ଞାପନ ବାହାରିବା ପରେ କାମଚଳା ଭାବରେ ବହିଗୁଡ଼ିକର ଖୁବ କମ, ଏପରିକି ମାତ୍ର ପାଞ୍ଚ ବା ଦଶଟି କପି ଛପାଇ ତାହାର ନମୁନା ସରକାରଙ୍କ ନିକଟରେ ଦାଖଲ କରିଥାଆନ୍ତି, ଯଦିଓ ଏଭଳି ଅନୈତିକ ପନ୍ଥାକୁ ସରକାରୀ ନୀତିରେ ବାରଣ କରାଯାଇଛି। ଦୀର୍ଘ ପାଞ୍ଚ ବା ଛଅ ବର୍ଷ ପରେ ସେଥିମଧ୍ୟରୁ କୌଣସି ପୁସ୍ତକ ଯୋଗ୍ୟ ବିବେଚିତ ହୋଇ ତାହାର ଯୋଗାଣ ପାଇଁ ସରକାରଙ୍କଠାରୁ ନିର୍ଦ୍ଦେଶ ପାଇବା ବେଳକୁ ସେହି ବହିର ମୁଦ୍ରଣ ଓ କାଗଜର ଖର୍ଚ୍ଚ ଅନେକ ବଢ଼ିଯାଇଥାଏ। ଏଣୁ ସେତେବେଳକୁ ଅନେକ ଲେଖକ ଓ ପ୍ରକାଶକ ପୂର୍ବସୂଚିତ ମୂଲ୍ୟରେ ବହିଟିକୁ ଛପାଇ ସରକାରଙ୍କୁ ଯୋଗାଇବାରେ ଅସମର୍ଥ ଥାଆନ୍ତି। ଏହି କାରଣରୁ ସରକାରଙ୍କ ଦ୍ବାରା ଘୋଷିତ ପୁସ୍ତକ କ୍ରୟ ତାଲିକାର ପ୍ରାୟ ଏକ ଚତୁର୍ଥାଂଶ ସଂଖ୍ୟକ ପୁସ୍ତକ ସରକାରଙ୍କ ଦ୍ବାରା ସଂଗୃହୀତ ହୋଇ ପାରୁନଥିବାର ଜଣାଯାଏ।

ସାହିତ୍ୟ ଓ ରାଜନୀତି ଅଙ୍ଗାଙ୍ଗୀ ଭାବରେ ଜଡ଼ିତ: ସୌମ୍ୟରଂଜନ ପଟ୍ଟନାୟକ

‘ଆମ ଅସ୍ମିତା ଓ ଆମ ସାହିତ୍ୟ’ ବିଷୟରେ ଆଲୋଚନା

ପ୍ରଥିତଯଶା ସାହିତ୍ୟିକ ପ୍ରଫେସର ବୈଷ୍ଣବ ଚରଣ ସାମଲଙ୍କ ୮୬ତମ ଜନ୍ମଦିବସ ଉପଲକ୍ଷେ ଧାରା ଶ୍ରୀରାଧା ଟ୍ରଷ୍ଟ ପକ୍ଷରୁ ‘ଆମ ଅସ୍ମିତା ଓ ଆମ ସାହିତ୍ୟ’ ବିଷୟରେ ଏକ ସାରସ୍ବତ ଆଲୋଚନାଚକ୍ର ଫେବ୍ରୁଆରୀ ୨୭ ତାରିଖରେ ଭୁବନେଶ୍ବରର ବୁଦ୍ଧ ମନ୍ଦିର ସଭାକକ୍ଷରେ ଅନୁଷ୍ଠିତ ହୋଇଯାଇଛି।
ଏହି ଅବସରରେ ନିଜର ଵକ୍ତବ୍ୟ ରଖି ‘ସମ୍ବାଦ’ର ପ୍ରାକ୍ତନ ସମ୍ପାଦକ ତଥା ଖଣ୍ଡପଡ଼ାର ବିଧାୟକ ସୌମ୍ୟରଂଜନ ପଟ୍ଟନାୟକ କହିଛନ୍ତି ଯେ ଅନେକ ସାହିତ୍ୟିକ ନିଜେ ରାଜନୀତିର ଉର୍ଦ୍ଧ୍ବରେ ରହିଥିବା କଥା ଦାବି କରିଥାଆନ୍ତି। କିନ୍ତୁ ପ୍ରକୃତ ପକ୍ଷେ ସାହିତ୍ୟ ଓ ରାଜନୀତି ଅଙ୍ଗାଙ୍ଗୀ ଭାବରେ ଜଡ଼ିତ। ସେ ମଧ୍ୟ କହିଲେ ଯେ ଆମର ଅସ୍ମିତାକୁ ଉଜାଗର କରି ରଖିବାରେ ସାହିତ୍ୟର ଏକ ଗୁରୁଦାୟିତ୍ବ ଅଛି। ଯେଉଁମାନେ ଓଡ଼ିଶାରେ ରହି ଅସ୍ମିତା ସୃଷ୍ଟି କରିଥାଆନ୍ତେ ଆମେ ସେମାନଙ୍କୁ ରାଜ୍ୟରେ ରହିବାକୁ ସୁଯୋଗ ଦେଇନାହୁଁ। ସବୁ ଯୋଗ୍ୟ ଲୋକ ଆମର ରାଜ୍ୟ ବାହାରକୁ ଚାଲିଯିବା ହେତୁ ଅଯୋଗ୍ୟ ଓ ଅଧାଯୋଗ୍ୟ ଲୋକଙ୍କୁ ନେଇ ଆମ ଏଠାକାର ସମସ୍ତ ବ୍ୟବସ୍ଥା ଚାଲିଛି। ଫଳରେ ଅସ୍ମିତା ଢାଙ୍କି ହୋଇପଡ଼ିଛି। ସେ କହିଲେ ଯେ ବେଳେବେଳେ ସେ ନିଜେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଈର୍ଷା କରନ୍ତି ଯେ ଓଡ଼ିଶାର ଲୋକେ ତାଙ୍କୁ କାହିଁକି ଏତେ ଭଲ ପାଆନ୍ତି! ସେମାନେ ତା’ଙ୍କୁ ପ୍ରକୃତରେ ଏତେ ଭଲ ପାଆନ୍ତି ଯେ ତା’ଙ୍କୁ ପାଞ୍ଚ ଥର ନିର୍ବାଚିତ କରି ପଚିଶ ବର୍ଷ ପାଇଁ ଶାସନ କ୍ଷମତା ପ୍ରଦାନ କରିଛନ୍ତି। କିନ୍ତୁ ଏହି ଭଲ ପାଇବାର ପ୍ରତିଦାନ ବା “ରିଟର୍ଣ ଗିଫ୍ଟ” ସ୍ବରୂପ ମୁଖ୍ୟମନ୍ତ୍ରୀ ମହୋଦୟ ଅନ୍ତତଃ ସେହି ଲୋକମାନଙ୍କ ରାଜ୍ୟର ଭାଷାଟିକୁ ଭଲ ପାଇ ପାରିଲେ କି? ଜଣେ ଚାହିଁଲେ, ଏହି ଦୀର୍ଘ କେତେ ବର୍ଷ ମଧ୍ୟରେ ବିଶ୍ବର ଯେ କୌଣସି ଭାଷା ଶିଖିପାରିବ। କିନ୍ତୁ ମୁଖ୍ୟମନ୍ତ୍ରୀ ସେଥିପ୍ରତି ଯତ୍ନବାନ ହେଲେ ନାହଁ। ଏହି ଅବସରରେ ସେ ସାହିତ୍ୟିକ ବୈଷ୍ଣବ ଚରଣ ସାମଲଙ୍କୁ ମଧ୍ୟ ଜନ୍ମଦିନର ଶୁଭେଚ୍ଛା ଓ ସମ୍ମାନ ଅର୍ପଣ କରିଥିଲେ।
ବର୍ଷୀୟାନ ଭାଷାବିତ୍ ଡ. ଦେବୀପ୍ରସନ୍ନ ପଟ୍ଟନାୟକ କହିଲେ ଯେ ଜାତିର ଅସ୍ମିତାକୁ ବିଶ୍ବର ଅସ୍ମିତା ସହିତ ମିଶାଇବା ହେଉଛି ଭାରତୀୟ ସଂସ୍କୃତିର ବିଶେଷତା। ବିଶିଷ୍ଟ ସାହିତ୍ୟିକ ତଥା ପୂର୍ବତନ ପୋଲିସ୍ ଆଇ.ଜି ବଟକୃଷ୍ଣ ତ୍ରିପାଠୀ କ‌ହିଲେ ଯେ ଆମର ଯାହା ଅଛି ଏବଂ ଯାହା ଥିଲା ତାହାକୁ ନେଇ ଗର୍ବ କରିବା ହିଁ ହେଉଛି ଅସ୍ମିତା। ମୁଖ୍ୟ ଅତିଥି ସ୍ବାମୀ ବ୍ରହ୍ମାନନ୍ଦ ସରସ୍ବତୀ ମଧ୍ୟ ଆଲୋଚ୍ୟ ପ୍ରସଙ୍ଗରେ ନିଜର ମୂଲ୍ୟବାନ ଅଭିମତ ରଖି କହିଲେ ଯେ ‘ଅହଂ ଓଡ଼ିଆ ଅସ୍ମି’, ଆମେ ସମସ୍ତେ ନିଜ ଭିତରେ ଏହି ଭାବ ଜାଗ୍ରତ କରିପାରିଲେ ଏକ ସାର୍ଥକ ଅସ୍ମିତାର ଅଧିକାରୀ ହୋଇପାରିବା। ନିଜ ଜନ୍ମଦିବସ ଉପଲକ୍ଷେ ପାଇଥିବା ସମ୍ବର୍ଦ୍ଧନାର ଉତ୍ତର ଦେଇ ପ୍ରଫେସର ବୈଷ୍ଣବ ଚରଣ ସାମଲ ସମସ୍ତଙ୍କ ପ୍ରତି ନିଜର ଆଭାର ପ୍ରକଟ କରିଥିଲେ। ସେ ସୌମ୍ୟରଂଜନ ପଟ୍ଟନାୟକଙ୍କୁ ଓଡ଼ିଆ ଅସ୍ମିତାର ଜଣେ ଜୀବନ୍ତ ପ୍ରତୀକ ବୋଲି ମଧ୍ୟ କହିଥିଲେ।
ଏହି ସଭାରେ ବିଜୟ କୁମାର ଶତପଥୀ, ନିରଞ୍ଜନ ସାହୁ ଓ ସୁରେଶ ଛୋଟରାୟଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା। ସଭାର ଆରମ୍ଭରେ ବିଶିଷ୍ଟ କବି ମଙ୍ଗଳା ପ୍ରସାଦ ପ୍ରଧାନ ଅତିଥିମାନଙ୍କୁ ସ୍ବାଗତ କରିଥିଲେ। କାର୍ଯ୍ୟକ୍ରମରେ ସହଦେବ ଜୟସିଂହ ସଭାପତିତ୍ବ କରିଥିଲେ। ଅନ୍ୟତମ ବିଶିଷ୍ଟ ଅତିଥି ଆର୍ଯ୍ୟ କୁମାର ଜ୍ଞାନେନ୍ଦ୍ର କାର୍ଯ୍ୟକ୍ରମଟିର ସଂଯୋଜନା କରିଥିଲେ। ଅନ୍ୟମାନଙ୍କ ମଧ୍ୟରେ ଡ଼. ଶକୁନ୍ତଳା ବଳିୟାର ସିଂହ, ଶିଶିର ନାୟକ, ବ୍ରଜବନ୍ଧୁ ପଣ୍ଡା, ସୁରେନ୍ଦ୍ର ନାଥ ଛୋଟରାୟ, ପ୍ରବୀର ପଟ୍ଟନାୟକ, ପୂର୍ଣ୍ଣ ଚନ୍ଦ୍ର ମଲ୍ଲିକ ପ୍ରମୁଖ ମଧ୍ୟ‌ ନିଜର ବକ୍ତବ୍ୟ ରଖିଥିଲେ। ଧାରା ଶ୍ରୀରାଧା ଟ୍ରଷ୍ଟର ପ୍ରତିଷ୍ଠାତା ଅମରେନ୍ଦ୍ର ମହାପାତ୍ର ଧନ୍ୟବାଦ ଅର୍ପଣ କରିଥିଲେ।

ଡ. ଅଭୟ ନାୟକ ହେଲେ ‘ଅଖିଳ ଭାରତୀୟ ସାହିତ୍ୟ ପରିଷଦ, ଓଡ଼ିଶା’ର ନୂତନ ଅଧ୍ୟକ୍ଷ

ପୁନର୍ଗଠିତ ହେଲା ପରିଷଦର ଓଡ଼ିଶା ଶାଖା

ଭୁବନେଶ୍ୱରର ସତ୍ୟନଗରସ୍ଥିତ ପୂର୍ତ୍ତ ଡାକବଙ୍ଗଳା ସଭାକକ୍ଷରେ ‘ଅଖିଳ ଭାରତୀୟ ସାହିତ୍ୟ ପରିଷଦ, ଓଡ଼ିଶା’ର ସାଧାରଣ ସଭା ଫେବୃଆରୀ ୨୫ ତାରିଖ ଦିନ ଅନୁଷ୍ଠିତ ହୋଇଯାଇଛି। ଏହି ସଭାରେ ଅଧ୍ୟକ୍ଷତା କରିଥିଲେ ଉତ୍କଳ ବିଶ୍ୱବିଦ୍ୟାଳୟର ପ୍ରାକ୍ତନ ସଂସ୍କୃତ ବିଭାଗ ମୁଖ୍ୟ ପ୍ରଫେସର ରଘୁନାଥ ପଣ୍ଡା। ଆଗାମୀ ଦିନରେ ଓଡ଼ିଆ ଭାଷା ସାହିତ୍ୟର କେମିତି ପ୍ରଚାର ପ୍ରସାର ତ୍ୱରାନ୍ୱିତ ହୋଇପାରିବ ସେଥିପାଇଁ ବିଭିନ୍ନ ପ୍ରସ୍ତାବ ଗୃହୀତ ହୋଇଥିଲା। ଶିକ୍ଷାୟତନ ଏବଂ ଗଣମାଧ୍ୟମରେ ଓଡ଼ିଆ ସାହିତ୍ୟର ଚର୍ଚ୍ଚା ଉପରେ ଗୁରୁତ୍ୱ ଆରୋପ କରାଯାଇଥିଲା।
ଏହାପରେ ନିର୍ବାଚନ ଅଧିକାରୀ ପ୍ରଫେସର ବସନ୍ତ କୁମାର ପଣ୍ଡାଙ୍କ ନିର୍ବାଚନ ପରିଚାଳନାରେ ଏକ ନୂତନ କାର୍ଯ୍ୟକାରିଣୀ ନିର୍ବାଚିତ ହୋଇଥିଲା ଯେଉଁଥିରେ ଡ. ଅଭୟ କୁମାର ନାୟକ ସର୍ବସମ୍ମତିକ୍ରମେ ଅଧ୍ୟକ୍ଷ ରୂପେନିର୍ବାଚିତ ହୋଇଥିଲେ। ଡ. ଅଭୟ ନାୟକ ଅଧୁନା ଜାତୀୟ ବିଜ୍ଞାନ ଶିକ୍ଷା ଓ ଗବେଷଣା ସଂସ୍ଥାନର କୁଳସଚିବ ରୂପେ କାର୍ଯ୍ୟରତ। ଏତତ୍ ବ୍ୟତୀତ ରେଭେନ୍ସା ବିଶ୍ୱବିଦ୍ୟାଳୟର ପ୍ରାକ୍ତନ ପ୍ରଫେସର ଡକ୍ଟର ସ୍ମରପ୍ରିୟା ମିଶ୍ର ଏବଂ ରାମଚନ୍ଦ୍ର ମର୍ଦରାଜ କଲେଜର ପ୍ରାକ୍ତନ ଓଡ଼ିଆ ବିଭାଗ ମୁଖ୍ୟ ଡକ୍ଟର ପ୍ରକାଶ ଚନ୍ଦ୍ର ପାଣିଗ୍ରାହୀ ଉପାଧ୍ୟକ୍ଷ ରୂପେ, ଡକ୍ଟର ସନ୍ତୋଷ କୁମାର ମହାପାତ୍ର ସାଧାରଣ ସମ୍ପାଦକ, ନାରାୟଣ ନାୟକ ସଂଗଠନ ସମ୍ପାଦକ ଏବଂ ଅଜିତ କୁମାର ଦାଶ, ରାମକୃଷ୍ଣ ତ୍ରିପାଠୀ, ପ୍ରତିଭା ପ୍ରିୟଦର୍ଶିନୀଙ୍କୁ ସମ୍ପାଦକ ରୂପେ ନିର୍ବାଚିତ କରାଯାଇଥିଲା। ପ୍ରଦୀପ୍ତ କୁମାର ଦାସଙ୍କୁ କୋଷାଧ୍ୟକ୍ଷ ଏବଂ ବିଭିନ୍ନ ଜିଲ୍ଲାରୁ ବାର ଜଣଙ୍କୁ ସଦସ୍ୟରୂପେ ନିର୍ବାଚିତ କରାଯାଇଥିଲା।
ନୂତନ କର୍ମକର୍ତ୍ତାଙ୍କ ଦାୟିତ୍ୱ ଗ୍ରହଣ ଅବସରରେ ନୂତନ ଭାବେ ନିର୍ବାଚିତ ଅଧ୍ୟକ୍ଷ ଡ. ଅଭୟ ନାୟକ କହିଲେ ଯେ ଆଗାମୀ ଦିନରେ ଅଖିଳ ଭାରତୀୟ ସାହିତ୍ୟ ପରିଷଦ ଓଡ଼ିଶାର ସଂସ୍କୃତି ଓ ପରମ୍ପରାକୁ ଲୋକପ୍ରିୟ କରିବା ସଙ୍ଗେ ସଙ୍ଗେ ପଞ୍ଚସଖା ସାହିତ୍ୟକୁ ପରିବ୍ୟାପ୍ତ କରିବାକୁ ପଦକ୍ଷେପ ନେବ। ଜାତୀୟ ସ୍ତରରେ ଓଡ଼ିଆ ସାହିତ୍ୟ କେମିତି ଅଗ୍ରଭାଗରେ ରହିପାରିବ ସେଥିପାଇଁ ପ୍ରଯତ୍ନ କରାଯିବା ସଙ୍ଗେ ସଙ୍ଗେ ଓଡ଼ିଶାର ପ୍ରତି ଜିଲ୍ଲାରେ ସାହିତ୍ୟ ସଂଗଠନ ମାଧ୍ୟମରେ ପରିଷଦର ଆଭିମୁଖ୍ୟକୁ ବିସ୍ତାର କରାଯିବ। ନୂତନ ଭାବେ ମନୋନୀତ ହୋଇଥିବା ସାଧାରଣ ସମ୍ପାଦକ ଡକ୍ଟର ସନ୍ତୋଷ କୁମାର ମହାପାତ୍ର ସମସ୍ତଙ୍କ ସହଯୋଗ କାମନା କରିଥିଲେ ଏବଂ ସଂଗଠନ ସମ୍ପାଦକ ନାରାୟଣ ନାୟକ ସଂଗଠନ ବିସ୍ତାର ପାଇଁ ସମସ୍ତଙ୍କୁ ଆହ୍ୱାନ ଦେଇଥିଲେ। ଶେଷରେ ଚିନ୍ମୟ ବୋଡେ଼ ଧନ୍ୟବାଦ ଅର୍ପଣ କରିଥିଲେ।

କଲିକତାରେ ଅନ୍ତର୍ଜାତୀୟ ମାତୃଭାଷା ଦିବସ ପାଳନ କଲେ ପ୍ରବାସୀ ଓଡ଼ିଆ

ଭଵ୍ୟ ସାରସ୍ବତ ସମାରୋହ

ଅନ୍ତର୍ଜାତୀୟ ମାତୃଭାଷା ଦିବସ ଉପଲକ୍ଷେ ଫେବୃଆରୀ ୨୧ ତାରିଖ ଦିନ ରାମନଗର କଲେଜ ସହ ବାଲିସାହି, ପୂର୍ବ ମେଦିନୀପୁର, ପଶ୍ଚିମ ବଙ୍ଗର ଶ୍ରେୟସି ସାହିତ୍ୟ ପରିବାରର ମିଳିତ ଉଦ୍ୟମରେ ଏକ ସ୍ବତନ୍ତ୍ର ଆଲୋଚନା ସଭା, ପୁସ୍ତକ ଉନ୍ମୋଚନ ଓ ବହୁଭାଷୀ ଅନଲାଇନ କବିତା ଆସର ଅନୁଷ୍ଠିତ ହୋଇଯାଇଛି। ଏହି ଆସରରେ ଓଡ଼ିଆ, ବଙ୍ଗଳା, ହିନ୍ଦୀ, ସମ୍ବଲପୁରୀ, ଗୁଜରାଟୀ ଏବଂ ଇଂରାଜୀ ଭାଷାରେ ଲିଖିତ ସ୍ବରଚିତ କବିତାମାନ ପାଠ କରାଯାଇଥିଲା। ଆମେରିକାରୁ ଅନଲାଇନରେ ଉପସ୍ଥିତ ଥିବା ତନ୍ଦ୍ରା ମିଶ୍ର ନିଜ ଜୀବନ, ଓଡ଼ିଆ ଭାଷା , ସାହିତ୍ୟ ଓ ମାଟି ସହ ତାଙ୍କର ସଂପର୍କ ବିଷୟରେ ଅନେକ କଥା କହିଥିଲେ। ଏହି ଆସରରେ ଓଡ଼ିଶାରୁ ଅଂଶ ଗ୍ରହଣ କରି ଶୋଭାବର୍ଦ୍ଧନ କରିଥିଲେ ବର୍ଷୀୟାନ ଲେଖକ ଓ କବି ସୁକୁମାର ଦାସ , ଲେଖକ ପ୍ରକାଶକ ତଥା ଓଡ଼ିଆ ସାହିତ୍ୟ ଏକାଡେମୀର ସଦସ୍ୟ କାଳୀପଦ ପଣ୍ଡା, ଦେବଯାନୀ ରାୟ , ଯୋଗଗୁରୁ ସନାତନ ମହାକୁଡ଼ ଏଵଂ ଫିରୋଜ କୁମାର ପଟେଲ। ଛତିଶଗଡ଼ରୁ ବିଶିଷ୍ଟ ହିନ୍ଦୀ କବି ଗୋବିନ୍ଦ ପାଲ୍, ଗୁଜରାଟରୁ ଇନ୍ଦ୍ରାଣୀ ନାଗ, ମନ୍ମଥ ନାଥ ଦାସ , ମନୋଜା ଦାସ ମହାପାତ୍ର , ଅରବିନ୍ଦ ମାଇତୀ ପ୍ରମୁଖ ମାତୃଭାଷା ଦିବସ ଅବସରରେ ଆୟୋଜିତ ଏହି କାର୍ଯ୍ୟକ୍ରମରେ ସାମିଲ ହୋଇ ଏହି ଦିବସରେ ଭାଷା ଲାଗି ବାଂଲା ଦେଶରେ ସଂଘଟିତ ରକ୍ତପାତ ଓ ସଂଗ୍ରାମ ସମ୍ପର୍କରେ ଆଲୋକପାତ କରିଥିଲେ। ସଂସ୍କୃତ କବିତା ପାଠ କରିଥିଲେ ଡ. ଗଗନ ଚନ୍ଦ୍ର ଦେ, ଡ. ନର ନାରାୟଣ ଦାଶ , ଇଂରାଜୀ କବିତା ପାଠ କରି ସମସ୍ତଙ୍କୁ ମୋହିତ କରିଥିଲେ ନାଗାଲାଣ୍ଡରୁ ଡ଼ ପ୍ରିୟରଂଜନ ଦାସ ଏବଂ ପୁରୀରୁ ସ୍କୁଲ ଛାତ୍ରୀ ଶ୍ରେୟା ଶେଫାଳି।
ଏହି ବହୁଭାଷୀ କବିତା ଆସର ମହାକୁମ୍ଭରେ ଭାଷା ଭିତ୍ତିକ ଆଦାନପ୍ରଦାନ ଏବଂ ଦେଶଦେଶ ମଧ୍ୟରେ ସୁସଂପର୍କ ସ୍ଥାପନ ହୋଇପାରିବ ବୋଲି କଥାକାର ଓ ଆଲୋଚକମାନେ ମତ ପ୍ରକାଶ କରିଥିଲେ। ଏଇ ଭବ୍ୟ ସଭାରେ ପଦ୍ମଲୋଚୋନ୍ କରଙ୍କ ବଙ୍ଗଳା ଭାଷାରେ ଲିଖିତ ଉପନ୍ୟାସ ଏଵଂ ରମେଶ ଚନ୍ଦ୍ର ଜେନାଙ୍କ ଲିଖିତ କବିତା ପୁସ୍ତକ ଉନ୍ମୋଚିତ ହୋଇଥିଲା। ସୁଭାଷ – କାନାଇଙ୍କ ଯୋଡ଼ିଙ୍କ ସୁମଧୁର ଗୀତ ସହ କାର୍ଯ୍ୟକ୍ରମର ସମାପ୍ତି ଘଟିଥିଲା ।

‘ସମାଜ’, ‘ସତ୍ୟବାଦୀ’ ଓ ଲୋକସେବକ ମଣ୍ଡଳରୁ ନିରଞ୍ଜନ ରଥଙ୍କ ଅବ୍ୟାହତି

ନିଯୁକ୍ତ ହେଲେ ନୂଆ ମୂଦ୍ରାକର ଓ ପ୍ରକାଶକ 

ଲୋକସେବକ ମଣ୍ଡଳ, କାର୍ଯ୍ୟନିର୍ବାହୀ କମିଟିର ନିଷ୍ପତ୍ତି କ୍ରମେ ଫେବୃଆରୀ ୨୧ ତାରିଖରୁ ନିରଞ୍ଜନ ରଥଙ୍କୁ ‘ସମାଜ’, ‘ସତ୍ୟବାଦୀ’ ତଥା ଲୋକସେବକ ମଣ୍ଡଳର ବିଭିନ୍ନ ଦାୟିତ୍ବରୁ ମୁକ୍ତ କରାଯାଇଛି। ଲୋକସେବକ ମଣ୍ଡଳର ନୂଆଦିଲ୍ଲୀ ସ୍ଥିତ ମୁଖ୍ୟାଳୟରୁ ଜାରି କରାଯାଇଥିବା କରାଯାଇଥିବା ଏକ ବିଜ୍ଞପ୍ତିରେ କୁହାଯାଇଛି ଯେ ଫେବୃଆରୀ ୨୧ ତାରିଖରୁ ନିରଞ୍ଜନ ରଥ ‘ସମାଜ’, ‘ସତ୍ୟବାଦୀ’ ଓ ‘ଜିମସାର୍’ର କୌଣସି ଦାୟିତ୍ବରେ ରହିବେ ନାହିଁ। ଏହା ସହିତ ମଧ୍ୟ କୁହାଯାଇଛି ଯେ ଅନୁଷ୍ଠାନର ଜେନେରାଲ୍ ମ୍ୟାନେଜର ତଥା ସଂପାଦକ ମହୋଦୟ ଏଥର ସ୍ବତନ୍ତ୍ର ଭାବରେ ଲୋକସେବକ ମଣ୍ଡଳର ସଭାପତି ରାଜ କୁମାର, ସଚିବ ପ୍ରଭାସ ଆଚାର୍ଯ୍ୟ, ତଥା କାର୍ଯ୍ୟ ନିର୍ବାହୀ କମିଟିର ଦୁଇଜଣ ସଦସ୍ୟ ଭୀମସେନ ଓ ନିମିଷା ଅମିନଙ୍କ ଅଧୀନରେ କାର୍ଯ୍ୟ କରିବେ। ଇତିମଧ୍ୟରେ ପ୍ରଭାସ ଆଚାର୍ଯ୍ୟଙ୍କୁ ‘ସମାଜ’ର ମୁଦ୍ରାକର ଓ ପ୍ରକାଶକ ଭାବରେ ମଧ୍ୟ ନିଯୁକ୍ତି ଦିଆଯାଇଛି।
ଅନୁଷ୍ଠାନରେ ଅର୍ଥନୈତିକ ଅନିୟମିତତା ସମ୍ପର୍କରେ କିଛି ମାସ ତଳେ ଲୋକସେବକ ମଣ୍ଡଳର ସଭାପତିଙ୍କ ନିକଟକୁ ଆସିଥିବା ଏକ ଇ-ମେଲକୁ ଆଧାର କରି ଏହି କାର୍ଯ୍ୟାନୁଷ୍ଠାନ ହୋଇଥିବା ଜଣାଯାଇଛି।

ଶାସ୍ତ୍ରୀୟ ଓଡ଼ିଆ ଭାଷା ଦିବସ ଉପଲକ୍ଷେ ନୂଆଦିଲ୍ଲୀରେ ମାତୃଭାଷା ସମ୍ମିଳନୀ

ଜେ.ଏନ୍.ୟୁରେ ବହୁଭାଷୀ ମାତୃଭାଷା ସମ୍ମିଳନୀ

ଓଡ଼ିଆ ଭାଷାକୁ ଶାସ୍ତ୍ରୀୟ ମାନ୍ୟତା ପ୍ରଦାନ ଦିବସ ଓ ବିଶ୍ବ ମାତୃଭାଷା ଦିବସ ଅବସରରେ ନୂଆଦିଲ୍ଲୀ ସ୍ଥିତ ଓଡ଼ିଆ ବୁଦ୍ଧିଜୀବୀ ଫୋରମ ‘ଦି ଇଣ୍ଟେଲେକ୍ଟସ୍’ ଦ୍ଵାରା ଆୟୋଜିତ ଦେଶର ଏକ ମାତ୍ର ଅନ୍ତର୍ଜାତୀୟ ମାତୃଭାଷା ସମ୍ମିଳନୀର ଦଶମ ସଂସ୍କରଣ ଜବାହାରଲାଲ ନେହେରୁ ବିଶ୍ଵବିଦ୍ୟାଳୟ ସ୍ଥିତ ଆଦିକବି ସାରଳା ଦାସ ଓଡ଼ିଆ ଚେୟାର ସହଯୋଗରେ ଫେବୃଆରୀ ୨୦ ତାରିଖ ଦିନ ଉଦଘାଟିତ ହୋଇଯାଇଛି। ଜାତୀୟ ସ୍ତରରେ ଓଡ଼ିଆ ଭାଷାର ବିଶାଳତା ଓ ଐତିହ୍ୟକୁ ଅନ୍ୟ ଭାଷାର ବିଶେଷଜ୍ଞମାନଙ୍କ ମଧ୍ୟରେ ଉପସ୍ଥାପନ କରିବା ସହିତ ଅନ୍ୟ ଭାରତୀୟ ଭାଷା ସହିତ ସମ୍ପର୍କକୁ ପ୍ରତିପାଦିତ କରିବା ଉଦ୍ଦେଶ୍ୟରେ ଅନୁଷ୍ଠାନର ଅଧ୍ୟକ୍ଷ ଦେବେନ୍ଦ୍ର ନାଥ ରାଉତଙ୍କ ଆବାହକତ୍ୱରେ ଗତ ଦଶ ବର୍ଷ ଧରି ଏହି ସମ୍ମିଳନୀ ‘ଲ୍ୟାଙ୍ଗ-ଫେଷ୍ଟ’ ଭାବରେ ଅନୁଷ୍ଠିତ ହୋଇ ଆସୁଛି। ଚଳିତ ବର୍ଷ ଆଦିକବି ସାରଳା ଦାସ ଓଡ଼ିଆ ଚେୟାରର ପ୍ରଫେସର ଡ଼. ଉଦୟନାଥ ସାହୁଙ୍କ ଅଧ୍ୟକ୍ଷତାରେ ଏହି ଦୁଇ ଦିନିଆ ସମ୍ମିଳନୀରେ ମୁଖ୍ୟ ଅତିଥି ଭାବରେ ଜେଏନୟୁର ଭାଷା ସାହିତ୍ୟ ଓ ସଂସ୍କୃତି ବିଭାଗର ଡିନ ପ୍ରଫେସର ଶୋଭା ଶିବଶଙ୍କରନ୍, ମୁଖ୍ୟ ବକ୍ତା ଭାବରେ ଜାତୀୟ ସିନ୍ଧି ଭାଷା ପ୍ରଚାର ସଂଗଠନର ନିର୍ଦେଶକ ପ୍ରଫେସର ରବିକାନ୍ତ ଟେକଚନ୍ଦାନୀ, ସମ୍ମାନିତ ଅତିଥି ଭାବରେ ପ୍ରଫେସର ସୁଧିର ପ୍ରତାପ ସିଂହ ଯୋଗଦେଇ ଆମ ଜୀବନରେ ମାତୃଭାଷାର ଗୁରୁତ୍ଵ ବିଷୟରେ ଆଲୋକପାତ କରିଥିଲେ। ଇତ୍ୟବସରରେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତିକୁ ବିଶ୍ଵ ଦରବାରରେ ଉପସ୍ଥାପନ କରିବାରେ ବିଶେଷ ଅବଦାନ ରଖିଥିବା ବିଶିଷ୍ଟ କବି ଓ ଭାରତ ସରକାରଙ୍କର ବୈଦେଶିକ ବ୍ୟାପାର ବିଭାଗର ପୂର୍ବତନ ସଚିବ ଅମରେନ୍ଦ୍ର ଖଟୁଆଙ୍କୁ ଚଳିତ ବର୍ଷ ପାଇଁ ‘ଆମ ଗୌରବ’ ସମ୍ମାନ ପ୍ରଦାନ କରାଯାଇଥିଲା।
ଏହି କାର୍ଯ୍ୟକ୍ରମର ଦ୍ଵିତୀୟ ସୋପାନରେ ଡ଼. ସୁବାସିନୀ ବାରିକଙ୍କ ସଭାପତିତ୍ବରେ ମାତୃଭାଷା ଦ୍ବାରା ପ୍ରଗତି ଓ ଆତ୍ମସମ୍ମାନ ଶୀର୍ଷକ ଆଲୋଚନାରେ ସଂସ୍କୃତ ଭାଷାରୁ ପ୍ରଫେସର ଭାଗିରଥି ନନ୍ଦ, ତାମିଲ ଭାଷାରୁ ଡ଼. ଜଲପ୍ପନ୍, ମାଲାୟାଲାମ ଭାଷାରୁ ଡ଼. ଶିବପ୍ରସାଦ ପୁନନ୍, କନ୍ନଡ ଭାଷାରୁ ଡ଼. କୁମାରୀ କେ, ତେଲୁଗୁ ଭାଷାରୁ ଡ଼. ଟି ସତୀଶ ନିଜର ମତାମତ ରଖିଥିଲେ। ଗ୍ରାମାଞ୍ଚଳରୁ ଆରମ୍ଭ କରି ବିଶ୍ଵର ଯେକୌଣସି କୋଣରେ ରହୁଥିଲେ ମଧ୍ୟ ପ୍ରତ୍ୟେକ ସ୍ଥାନରେ ମାତୃଭାଷାକୁ ସମ୍ମାନ ଦେବା ସହିତ ଏହାର ବିଶାଳତାକୁ ଗର୍ବର ସହିତ ଉପସ୍ଥାପନ କରି ଜାତୀୟ ଏକତା ଓ ପ୍ରଗତିକୁ ସୁଦୃଢ଼ କରିବା ପାଇଁ ବିଶେଷଜ୍ଞମାନେ ଦୃଢ଼ ମତ ରଖିଥିଲେ। ଏହି କାର୍ଯ୍ୟକ୍ରମର ମଞ୍ଚ ପରିଚାଳନା କରିଥିଲେ ନିର୍ଦ୍ଦେଶ ପ୍ରଜାପତି ଓ ଡ଼. ମାଲଖାନ ସିଂ। ପରବର୍ତ୍ତୀ ଦିନ ଅନୁଷ୍ଠାନ ପକ୍ଷରୁ ‘ଓଡ଼ିଆ ଭାଷାର ସମସ୍ୟା ଓ ତା’ର ସମାଧାନ’ ଉପରେ ଆଧାରିତ ଏକ ସ୍ବତନ୍ତ୍ର ଅଧିବେଶନ ଅନଲାଇନ୍ ମାଧ୍ୟମରେ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି।
ପ୍ରକାଶ ଥାଉକି ୨୦ ଫେବୃଆରୀ ୨୦୧୪ ଦିନ ଅନୁଷ୍ଠିତ ହୋଇଥିବା କେନ୍ଦ୍ର ସରକାରଙ୍କ କ୍ୟାବିନେଟ୍ ବୈଠକରେ ଓଡ଼ିଆ ଭାଷାକୁ ଶାସ୍ତ୍ରୀୟ ମର୍ଯ୍ୟାଦା ଦେବାପାଇଁ ବିହିତ କାର୍ଯ୍ୟାନୁଷ୍ଠାନ କରିବାକୁ ନିଷ୍ପତ୍ତି ହୋଇଥିଲା। ଏ ଦୃଷ୍ଟିରୁ ‘ଦି ଇଣ୍ଟେଲେକ୍ଟସ୍’ ଅନୁଷ୍ଠାନ ପକ୍ଷରୁ ପ୍ରତିବର୍ଷ ଏହି ଦିନ ଶାସ୍ତ୍ରୀୟ ଓଡ଼ିଆ ଭାଷା ଦିବସ ଭାବରେ ପାଳନ କରାଯାଇଥାଏ। ତେବେ ସେହି ବର୍ଷ ମାର୍ଚ୍ଚ ୧୧ ତାରିଖରେ ଓଡ଼ିଆ ଭାଷାକୁ ଏକ ଶାସ୍ତ୍ରୀୟ ଭାଷା ଭାବରେ ଘୋଷଣା କରି କେନ୍ଦ୍ର ସରକାରଙ୍କ ଗେଜେଟ୍ ରେ ବିଜ୍ଞପ୍ତି ଜାରି ହୋଇଥିବାରୃ ଓଡ଼ିଶା ସରକାରଙ୍କ ପକ୍ଷରୁ ପ୍ରତି ବର୍ଷ ମାର୍ଚ୍ଚ ୧୧ ଦିନଟିକୁ ଶାସ୍ତ୍ରୀୟ ଭାଷା ଦିବସ ଭାବରେ ପାଳନ କରାଯାଏ।

ଓଡ଼ିଆ ସାରସ୍ଵତ ଜଗତର ଭୀଷ୍ମ ପିତାମହ ସାତକୋଡ଼ି ହୋତା ଆଉ ନାହାନ୍ତି

୯୫ ବର୍ଷ ବୟସରେ ଦେହାବସାନ 

ଓଡ଼ିଆ ସାହିତ୍ୟର ଭୀଷ୍ମ ପିତାମହ ଡକ୍ଟର ସାତକୋଡ଼ି ହୋତା ଫେବୃଆରୀ ୧୧ ତାରିଖ ମଧ୍ୟାହ୍ନରେ ୯୫ ବର୍ଷ ବୟସରେ ଭୁବନେଶ୍ଵରରେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ସେ କିଛି ଦିନ ହେଲା ଶଯ୍ୟାଶାୟୀ ଥିଲେ, ଏବଂ ଭୁବନେଶ୍ବରର ନୟାପଲ୍ଲୀଠାରେ ଥିବା ତାଙ୍କ କନ୍ୟାଙ୍କ ବାସଭବନରେ ଅବସ୍ଥାନ କରୁଥିଲେ। ମୃତ୍ୟୁ ଶଯ୍ୟା ନିକଟରେ ଅନ୍ୟମାନଙ୍କ ସହ ତାଙ୍କର କନ୍ୟା ଓ ଜାମାତା ଉପସ୍ଥିତ ଥିଲେ। ଅପରାହ୍ନରେ ତାଙ୍କର ପାର୍ଥିବ ଶରୀରକୁ ଷ୍ଟେସନ ଛକରେ ଥିବା ତାଙ୍କର ନିଜସ୍ବ ବାସଭବନକୁ ଅଣାଯାଇଥିଲା, ଏବଂ ସେଠାରେ ବହୁସଂଖ୍ୟକ ଶୋକାକୁଳ ସାହିତ୍ୟିକ, ରାଜନେତା, ସମାଜସେବୀ ତଥା ଗୁଣମୁଗ୍ଧ ବ୍ୟକ୍ତିବିଶେଷ ତାଙ୍କ ପ୍ରତି ଶ୍ରଦ୍ଧାସୁମନ ଅର୍ପଣ କରିଥିଲେ।
ଡ଼. ସାତକଡି ହୋତା ଓଡ଼ିଶାର ସାହିତ୍ୟ ଏବଂ ସାମାଜିକ ଜଗତରେ ଜଣେ ବର୍ଷୀୟାନ ତଥା ସ୍ୱନାମଧନ୍ୟ ବ୍ୟକ୍ତିତ୍ୱ ଭାବରେ ସୁପରିଚିତ ଥିଲେ । ଭାରତୀୟ ରେଳବାଇ ସର୍ଭିସ୍‌ରେ ଯୋଗ ଦେଇ ସେ ଖୋର୍ଦ୍ଧା ରୋଡ ଡିଭିଜନର ଡିଭିଜନାଲ ସୁପରିଣ୍ଟେଣ୍ଡେଣ୍ଟ୍‌, ପାରାଦ୍ୱୀପ ବନ୍ଦର ବୋର୍ଡ଼ର ଟ୍ରଷ୍ଟି, ଓଡିଶା ସରକାରଙ୍କ ସମନ୍ୱୟ କମିଶନର ତଥା ପରିବହନ ବିଭାଗର ସ୍ପେଶାଲ ସେକ୍ରେଟାରୀ ଆଦି ବହୁ ଗୁରୁତ୍ୱପୂର୍ଣ୍ଣ ପଦବୀରେ ସେବା ପ୍ରଦାନ କରିବା ପରେ ୧୯୮୭ ମସିହାରେ ରେଳବାଇର ଜେନେରାଲ ମ୍ୟାନେଜର ପଦରେ ଥାଇ ଅବସର ଗ୍ରହଣ କରିଥିଲେ । ଓଡ଼ିଆ ଭାଷାର ଜଣେ ଅଗ୍ରଣୀ ସ୍ରଷ୍ଟା ତଥା ସାହିତ୍ୟ ସଂଗଠକ ଭାବରେ ସେ ଅଧିକ ପରିଚିତ ଥିଲେ । ଓଡିଶା ସାହିତ୍ୟ ଏକାଡେମୀ ପୁରସ୍କାର ତଥା ସାରଳା ପୁରସ୍କାରରେ ସମ୍ମାନିତ ଡ଼. ହୋତାଙ୍କୁ ଓଡ଼ିଶା ସଂସ୍କୃତି ବିଶ୍ୱବିଦ୍ୟାଳୟ ପକ୍ଷରୁ ସମ୍ମାନ ସୂଚକ ଡି.ଲିଟ୍‌. ଉପାଧିରେ ଭୂଷିତ କରାଯାଇଛି । ଜୀବନର ଅନ୍ତିମ କ୍ଷଣ ପର୍ଯ୍ୟନ୍ତ ଡ଼.ହୋତା ପ୍ରତିଷ୍ଠିତ ଓଡ଼ିଆ ସମ୍ବାଦପତ୍ର ‘ସମୟ’ର ସଂପାଦକ ଭାବରେ ଦାୟିତ୍ୱ ନିର୍ବାହ କରିଥିଲେ। ତାଙ୍କ ଦ୍ବାରା ରଚିତ ଶତାଧିକ ପୁସ୍ତକ ଓଡ଼ିଶାର ବାଣୀ ବିଭବକୁ ସମୃଦ୍ଧ କରିଛି, ଯେଉଁଗୁଡିକ ମଧ୍ୟରେ ‘ବ୍ୟାକୁଳ ହୃଦୟ’, ‘କୃଶବିଦ୍ଧ’ ଓ ‘ଧର୍ମଯୁଦ୍ଧ’ ଆଦି ଉପନ୍ୟାସ ତଥା ‘କିରିବୁରୁ କନ୍ୟା’, ଓ ‘ରାଜଧାନୀର ସକାଳ’ ଆଦି ଗଳ୍ପ ସଂକଳନ ବିଶେଷ ପାଠକୀୟ ଆଦୃତି ଲାଭ କରିଛି।
ଡ. ସାତକୋଡ଼ି ହୋତାଙ୍କର ଧର୍ମପତ୍ନୀ ତଥା ବିଶିଷ୍ଟ ସମାଜସେବୀ ଓ ‘ଅମୃତାୟନ’ର ସମ୍ପାଦିକା ଗୀତା ହୋତାଙ୍କ ୨୦୨୨ ମସିହା ଡିସେମ୍ବର ମାସରେ ଦେହାନ୍ତ ଘଟିଥିଲା।

୧୦ମ କଳିଙ୍ଗ ଲିଟେରାରୀ ଫେଷ୍ଟିଭାଲ୍ ଉଦ୍ଘାଟନ କଲେ ମୁଖ୍ୟମନ୍ତ୍ରୀ

ଆରମ୍ଭ ହେଲା ତିନି-ଦିନିଆ ସାହିତ୍ୟ ମହୋତ୍ସବ

ଭୁବନେଶ୍ବରର ସ୍ବସ୍ତି ପ୍ରିମିୟମ ହୋଟେଲ୍ ପରିସରରେ ୧୦ମ ‘କଳିଙ୍ଗ ଲିଟେରାରୀ ଫେଷ୍ଟିଭାଲ’ ଫେବୃଆରୀ ୯ ତାରିଖ ଦିନ ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ବାରା ଆଭାସୀ ମାଧ୍ୟମରେ ଉନ୍ମୋଚିତ ହେଇଯାଇଛି। ଏହି ତିନିଦିନିଆ ସାହିତ୍ୟ ମହୋତ୍ସବର ମୁଖ୍ୟ ପ୍ରସଙ୍ଗ ରହିଛି, ‘ପ୍ରାଚୀନ ଭାରତୀୟ କିଂବଦନ୍ତୀର ଅନ୍ତରାଳେ: ଏକବିଂଶ ଶତାବ୍ଦୀ ପାଇଁ ପ୍ରେରଣା।’ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କର ଉଦ୍ଘାଟନୀ ବକ୍ତବ୍ୟରେ ଆଶା ପ୍ରକାଶ କରିଛନ୍ତି ଯେ ଏହି ମହୋତ୍ସବ ଭାରତର ମହାନ ସାହିତ୍ୟିକ ପରମ୍ପରାଗୁଡ଼ିକୁ ଯୋଡ଼ିବା ପାଇଁ ଏକ ସେତୁ ଭଳି କାର୍ଯ୍ୟ କରିବ। ଏହି ସଭାରେ ଅତିଥିମାନଙ୍କୁ ସ୍ବାଗତ କରି ଅନୁଷ୍ଠାନର ନିର୍ଦ୍ଦେଶକ ରଶ୍ମୀରଂଜନ ପରିଡ଼ା କହିଛନ୍ତି ଯେ ଏହି ସାହିତ୍ୟ ମହୋତ୍ସବ ଆମକୁ ନିଜର ସାରସ୍ବତ ଐତିହ୍ୟ ପ୍ରତି ଦାୟିତ୍ବ ନିର୍ବାହ କରିବାପାଇଁ ଅନୁପ୍ରେରିତ କରେ। ଏହି ଅବସରରେ ସଂତୃପ୍ତ ମିଶ୍ର, ଅମରୀଶ ତ୍ରିପାଠୀ, ସୀତାକାନ୍ତ ମହାପାତ୍ର ଓ ପାରମିତା ପଣ୍ଡା ପ୍ରମୁଖ ମଧ୍ୟ ନିଜର ବକ୍ତବ୍ୟ ରଖିଥିଲେ।
ଦେଶ ତଥା ବିଏଥିରେ ଦେଶର ପ୍ରାୟ ୩୦୦ଜଣ ସାହିତ୍ୟିକ, ବୁଦ୍ଧିଜୀବି ତଥା ସାଂସ୍କୃତିକ ବ୍ୟକ୍ତିତ୍ବ ଯୋଗ ଦେଇଛନ୍ତି। ୨୦୧୪ ମସିହାରେ ଆରମ୍ଭ ହୋଇଥିବା ଏହି କଳିଙ୍ଗ ସାହିତ୍ୟ ମହୋତ୍ସବ ଜାତୀୟ ସ୍ତରରେ ସାହିତ୍ୟିକ ଭାବବିନିମୟର ଏକ ମଂଚ ଭାବରେ କାର୍ଯ୍ୟ କରିଆସୁଛି।

ବିଶ୍ଵ ଓଡ଼ିଆ ଭାଷା ସମ୍ମିଳନୀ ଉପରେ ସିଂହାବଲୋକନ କଲେ ମାତୃଭାଷା-ପ୍ରେମୀ

ମାତୃଭାଷାର ସୁରକ୍ଷା ପାଇଁ ଆଲୋଚନା ସଭା

ଓଡ଼ିଆ ଭାଷା ଆନ୍ଦୋଳନର ପ୍ରତିଷ୍ଠାତା ସୁଭାଷ ଚନ୍ଦ୍ର ପଟ୍ଟନାୟକଙ୍କ ଆବାହକତ୍ବରେ ଫେବୃଆରୀ ୭ ତାରିଖ ଦିନ ଭୁବନେଶ୍ବରର ଲୋହିଆ ଏକାଡେମୀରେ ମାତୃଭାଷା-ପ୍ରେମୀମାନଙ୍କର ଏକ ସଭା ଅନୁଷ୍ଠିତ ହୋଇଯାଇଛି। ଏହି ସଭାର ଆଲୋଚ୍ୟ ବିଷୟ ଥିଲା, ‘ବିଶ୍ବ ଓଡ଼ିଆ ଭାଷା ସମ୍ମିଳନୀ ଉପରେ ସିଂହାବଲୋକନ।’
ଏହି ଅବସରରେ ନିଜର ବକ୍ତବ୍ୟ ରଖି ସୁଭାଷ ଚନ୍ଦ୍ର ପଟ୍ଟନାୟକ ପ୍ରଥମ ଭାଷାଭିତ୍ତିକ ରାଜ୍ୟ ଭାବରେ ଓଡ଼ିଶା ରାଜ୍ୟର ଗଠନ ଉପରେ ଆଲୋକପାତ କରିଥିଲେ ତଥା ଓଡ଼ିଶାର ସରକାରୀ କାର୍ଯ୍ୟରେ ଓଡ଼ିଆ ଭାଷାର ପ୍ରୟୋଗ ପାଇଁ ଅତୀତରେ ସୃଷ୍ଟି ହୋଇଥିବା ପ୍ରତିବନ୍ଧକ ବିଷୟରେ ଆଲୋଚନା କରିଥିଲେ। ସେ କହିଲେ ଯେ ପ୍ରତି ପାଞ୍ଚ ବର୍ଷରେ ବିଶ୍ବ ଓଡ଼ିଆ ଭାଷା ସମ୍ମିଳନୀର ଆୟୋଜନ ପାଇଁ ସରକାରୀ ସ୍ତରରେ ୨୦୧୭ ମସିହାରେ ନିଷ୍ପତ୍ତି ହୋଇଥିଲେ ସୁଦ୍ଧା ସାତବର୍ଷ କାଳ ଏହାକୁ କାର୍ଯ୍ୟକାରୀ ନ କରି ଏବେ ଆଗାମୀ ନିର୍ବାଚନକୁ ଆଖି ଆଗରେ ରଖି ତରବରିଆ ଭାବରେ ଏହା ଆୟୋଜିତ ହୋଇଛି। ଭାଷା ଆନ୍ଦୋଳନର ଅନ୍ୟତମ ପୁରୋଧା ଶଙ୍କର ପରିଡ଼ା ଓଡ଼ିଆ ଭାଷାର ସୁରକ୍ଷା ଦାବିରେ ଅତୀତରେ ହୋଇଥିବା କଳା ପତାକା ଅଭିଯାନ ବିଷୟରେ ବିସ୍ତୃତ ସୂଚନା ଦେଇଥିଲେ। ସେ ବିଶ୍ବ ଓଡ଼ିଆ ଭାଷା ସମ୍ମିଳନୀରେ ଓଡ଼ିଆ ଭାଷାର ବିକୃତିକରଣ ବିଷୟରେ ମଧ୍ୟ କହିଥିଲେ। ଆଗାମୀ ଦିନରେ ଭାଷା ଆନ୍ଦୋଳନକୁ ପ୍ରଖରତର କରିବାପାଇଁ ସେ ନିବେଦନ କରିଥିଲେ। ଯୁବ ଭାଷାକର୍ମୀ କିଶନ ବରାଇ କହିଲେ ଯେ ଅତୀତରେ ସକ୍ରିୟ ଥିବା ଭାଷା ଆନ୍ଦୋଳନର କଳା ପତାକା ଅଭିଯାନ ଏବେ ଧୀମେଇ ପଡ଼ିଥିବା ପରିତାପର ବିଷୟ। ସୁପରିଚିତ ଭାଷା ଗବେଷକ ସୁବ୍ରତ କୁମାର ପୃଷ୍ଟି ଓଡ଼ିଆ ଭାଷା ଆନ୍ଦୋଳନର ବିସଙ୍ଗତିଗୁଡ଼ିକ ବିଷୟରେ ଚର୍ଚ୍ଚା କରିଥିଲେ, ଏବଂ କହିଥିଲେ ଯେ ଏହା କ୍ଷୋଭ ପ୍ରକାଶ କରିବାର ସମୟ ନୁହେଁ, ବରଂ ସମୟ ହେଉଛି ନିଷ୍ପତ୍ତି ନେବାର। ଅନ୍ୟାନ୍ୟ ଉପସ୍ଥିତ ବକ୍ତାଗଣ ମଧ୍ୟ ଏ ବିଷୟରେ ନିଜର ବକ୍ତବ୍ୟ ରଖିଥିଲେ।
ଏହି ସଭାରେ ସର୍ବସମ୍ମତିକ୍ରମେ ଗୃହୀତ ଏକ ପ୍ରସ୍ତାବରେ କୁହାଯାଇଛି ଯେ ତଥାକଥିତ ବିଶ୍ବ ଓଡ଼ିଆ ଭାଷା ସମ୍ମିଳନୀରେ ଅନଧିକୃତ ଭାବରେ ହୋଇଥିବା ବିପୁଳ ଅର୍ଥ ବ୍ୟୟର ସାମାଜିକ ସମୀକ୍ଷା ହେଉ ଓ ଅନିୟମିତତା ବିରୁଦ୍ଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ହେଉ। ଗୃହୀତ ପ୍ରସ୍ତାବରେ ଏହି ସମ୍ମିଳନୀରେ ଓଡ଼ିଆ ଭାଷାର ମୌଳିକ ଅକ୍ଷର ସମ୍ଭାର ତଥା ଉଚ୍ଚାରଣ ବୈଶିଷ୍ଟ୍ୟ ବିପର୍ଯ୍ୟସ୍ତ କରି ଓଡ଼ିଆ ଜାତି ପ୍ରତି ତାତ୍ସଲ୍ୟ ପ୍ରଦର୍ଶନ କରିଥିବା ହେତୁ ରାଜ୍ୟ ସରକାରଙ୍କୁ ଭର୍ତ୍ସନା କରାଯାଇଛି।

ଜେ.ଏନ୍.ୟୁରେ ଓଡ଼ିଆ ଭାଷା ଓ ସାହିତ୍ୟ ବିଭାଗ ଖୋଲିବା ପାଇଁ ବୁଝାମଣାପତ୍ର ସ୍ଵାକ୍ଷରିତ

ବିଜୁ ପଟ୍ଟନାୟକଙ୍କ ନାମରେ ଖୋଲିବ ସ୍ଵତନ୍ତ୍ର ବିଭାଗ

ନୂଆଦିଲ୍ଲୀ ସ୍ଥିତ ଜବାହରଲାଲ ନେହେରୁ ବିଶ୍ୱବିଦ୍ୟାଳୟ (ଜେ.ଏନ୍.ୟୁ)ରେ ଓଡ଼ିଆ ବିଭାଗ ଖୋଲିବା ପାଇଁ ଫେବୃଆରୀ ଚାରି ତାରିଖ ଦିନ ଓଡ଼ିଶା ସରକାର ଏବଂ ଜେ.ଏନ୍.ୟୁ ମଧ୍ୟରେ ରାଜ୍ୟ ସଚିବାଳୟରେ ଏକ ବୁଝାମଣା ପତ୍ର ସ୍ବାକ୍ଷରିତ ହୋଇଯାଇଛି। ଓଡ଼ିଶା ସରକାରଙ୍କ ପକ୍ଷରୁ ଉଚ୍ଚ ଶିକ୍ଷା ବିଭାଗର ଶାସନ ସଚିବ ଅରବିନ୍ଦ ଅଗ୍ରଓ୍ବାଲ ଓ ଜେ.ଏନ୍.ୟୁ ପକ୍ଷରୁ ଏହାର କୁଳପତି ଡ. ଶାନ୍ତିଶ୍ରୀ ଧୂଲିପୁଡ଼ି ପଣ୍ଡିତ ଏଥିରେ ସ୍ବାକ୍ଷର କରିଛନ୍ତି। ଏହା ଫଳରେ ସେହି ବିଶ୍ବବିଦ୍ୟାଳୟରେ ଯଥାଶୀଘ୍ର ଏକ ପୂର୍ଣ୍ଣାଙ୍ଗ ଓଡ଼ିଆ ଭାଷା ଓ ସାହିତ୍ୟ ବିଭାଗ କାର୍ଯ୍ୟକ୍ଷମ ହୋଇ ସ୍ନାତକୋତ୍ତର ଶ୍ରେଣୀରେ ଏହି ବିଷୟରେ ଶିକ୍ଷାଦାନ ଓ ଉଚ୍ଚତର ଗବେଷଣା କାର୍ଯ୍ୟ ସମ୍ପନ୍ନ ହେବ। ଏହି ବିଭାଗଟି ‘ବିଜୁ ପଟ୍ଟନାୟକ ସ୍ବତନ୍ତ୍ର ଓଡ଼ିଆ ପାଠ୍ୟକ୍ରମ କେନ୍ଦ୍ର’ ଭାବରେ ନାମିତ ହେବ।
ଜେ.ଏନ୍.ୟୁରେ ଏହି ଓଡ଼ିଆ ଭାଷା ଓ ସାହିତ୍ୟ ବିଭାଗ ଖୋଲିବା ପାଇଁ ବହୁ ଦିନ ଧରି ଏହି ବିଶ୍ବବିଦ୍ୟାଳୟର କର୍ତ୍ତୃପକ୍ଷଙ୍କ ସହ ଓଡ଼ିଶା ସରକାରଙ୍କ ଆଲୋଚନା ହୋଇଆସୁଥିଲା। ଏହି ଉଦ୍ଦେଶ୍ୟରେ ଗତ ଡିସେମ୍ବର ୨୯ ତାରିଖରେ ଜେ.ଏନ୍.ୟୁର କୁଳପତି ଭୁବନେଶ୍ବର ଆସି ଓଡ଼ିଶା ସରକାରଙ୍କ ଉଚ୍ଚ ପଦାଧିକାରୀମାନଙ୍କ ସହିତ ବୈଠକରେ ମିଳିତ ହୋଇଥିଲେ। ଓଡ଼ିଶା ସରକାର ପ୍ରାରମ୍ଭିକ ପର୍ଯ୍ୟାୟରେ ଏହି ନୂତନ ଓଡ଼ିଆ ଭାଷା ଓ ସାହିତ୍ୟ ବିଭାଗଟି ଖୋଲିବା ପାଇଁ ଦଶ କୋଟି ଟଙ୍କାର କର୍ପସ ପାଣ୍ଠି ଯୋଗାଇ ଦେବାପାଇଁ ସମ୍ମତ ହୋଇଛନ୍ତି।
ପ୍ରକାଶ ଥାଉକି ୨୦୧୭ ମସିହାରେ ଏହି ବିଶ୍ବବିଦ୍ୟାଳୟର କର୍ତ୍ତୃପକ୍ଷଙ୍କ ସହ ଓଡ଼ିଶା ସରକାରଙ୍କ ଆଉ ଏକ ବୁଝାମଣା ପତ୍ର ସ୍ବାକ୍ଷରିତ ହୋଇ ଜେ.ଏନ୍.ୟୁରେ ଆଦିକବି ସାରଳା ଦାସ ଚେଆର୍ ପ୍ରତିଷ୍ଠା କରାଯାଇଥିଲା ଏବଂ ଡ଼. ଉଦୟନାଥ ସାହୁ ବର୍ତ୍ତମାନ ଏହାର ଚେଆର୍ ପ୍ରଫେସର ଅଛନ୍ତି।

ଭୁବନେଶ୍ବରରେ ଆରମ୍ଭ ହେଲା ତିନିଦିନିଆ ବିଶ୍ବ ଓଡ଼ିଆ ଭାଷା ସମ୍ମିଳନୀ

ଉନ୍ମୋଚନ ସମାରୋହର ସଭାମଂଚ

ଭୁବନେଶ୍ବର ଜନତା ମଇଦାନରେ ସ୍ଥାପନ କରାଯାଇଥିବା ‘ଆଦିକବି ସାରଳା ଦାସ କକ୍ଷ’ରେ ମାର୍ଚ୍ଚ ୩ ତାରିଖ ପୂର୍ବାହ୍ନରେ ପ୍ରଥମ ବିଶ୍ବ ଓଡ଼ିଆ ଭାଷା ସମ୍ମିଳନୀର ଓଡ଼ିଶାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ବାରା ଉଦ୍ଘାଟିତ ହୋଇଯାଇଛି। ଏହି ଅବସରରେ ନିଜର ବକ୍ତବ୍ୟ ରଖି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି ଯେ ଓଡ଼ିଆ ଭାଷା ଆମର ପରିଚୟ। ଆଦିକବି ସାରଳା ଦାସଙ୍କୁ ପ୍ରଣାମ ନିବେଦନ କରି ସେ କହିଥିଲେ ଯେ ଓଡ଼ିଆ ଭାଷା ଏକ ସମୃଦ୍ଧ ଭାଷା ଏବଂ ଏହି ଭାଷାର ଅଧିକ ବ୍ୟବହାର ଉପରେ ଆଲୋଚନା ହେଉ।
ଓଡ଼ିଶାର ରାଜ୍ୟ ସଂଗୀତ ‘ବନ୍ଦେ ଉତ୍କଳ ଜନନୀ’ ଗାନ ପୂର୍ବକ ସଭାକାର୍ଯ୍ୟ ଆରମ୍ଭ ହୋଇଥିଲା। ଅତିଥିମାନଙ୍କୁ ସ୍ବାଗତ କରି ବିଭାଗୀୟ ଶାସନ ସଚିବ ସୁଜାତା କାର୍ତ୍ତିକେୟନ୍ କହିଲେ ଯେ ଏହି ସମ୍ମିଳନୀରେ ଚାରୋଟି ଦେଶରୁ ଆସିଥିବା ବିଶେଷଜ୍ଞ ଏବଂ ୧୦୦ରୁ ଉର୍ଦ୍ଧ୍ବ ବକ୍ତା ନିଜର ବକ୍ତବ୍ୟ ରଖିବେ। ରାଜ୍ୟ ସଂସ୍କୃତି ମନ୍ତ୍ରୀ ଆୟୋଜିତ କାର୍ଯ୍ୟକ୍ରମର ଗୁରୁତ୍ବ ସମ୍ପର୍କରେ ସୂଚନା ପ୍ରଦାନ କରିଥିଲେ। ଏହାପରେ ବିଦେଶାଗତ ପ୍ରଫେସର ଆର୍ଲୋ ଗ୍ରିଫିଥ୍ସ ନିଜର ଖଣ୍ଡି-ଓଡ଼ିଆ ଭାଷାରେ ବକ୍ତବ୍ୟ ଦେଇ ସମସ୍ତଙ୍କୁ ଚମତ୍କୃତ କରି ଦେଇଥିଲେ, ଏବଂ କହିଲେ ଯେ ଓଡ଼ିଆ ହେଉଛି ତାଙ୍କର ଭାଷା। ବିଶିଷ୍ଟ କବି ସୀତାକାନ୍ତ ମହାପାତ୍ର କହିଥିଲେ ଯେ ଓଡ଼ିଆ ଭାଷାର ଅସ୍ତିତ୍ବ ଓ ଭବିଷ୍ୟତ ବିଷୟରେ ସେ ନିଃସନ୍ଦେହ। ସେ ମତ ଦେଇଥିଲେ ଯେ ଆଜି ସମସ୍ତଙ୍କର ବଡ଼ ଦାୟିତ୍ବ ହେଲା ପାଠକ ସୃଷ୍ଟି କରିବା। ସ୍ବନାମଧନ୍ୟା ଲେଖିକା ପ୍ରତିଭା ରାୟ ଓଡ଼ିଆ ଭାଷାର ସଂକଟ କାଳରେ ଏହି ଭାଷାସମ୍ମିଳନୀର ଆୟୋଜନ ଅଧିକ ଗୁରୁତ୍ବ ରଖେ ବୋଲି କହିଥିଲେ। ବର୍ଷୀୟାନ ଭାଷାବିତ୍ ଦେବୀପ୍ରସନ୍ନ ପଟ୍ଟନାୟକ କହିଥିଲେ ଯେ ଏହି ସମ୍ମିଳନୀରେ ସେ ପାଇଥିବା ସମ୍ମାନ ହେଉଛି ମାତୃଭାଷା ଓ ମାତୃଭାଷାର ସମ୍ମାନ। ଯୁବ ଓ ନୂତନ ପୀଢ଼ିର ଓଡ଼ିଆଭାଷୀମାନଙ୍କ ପକ୍ଷରୁ ସ୍ବୟଂସ୍ବରୂପା କର ମଧ୍ୟ ଏହି ଉପଲକ୍ଷେ ନିଜର ବକ୍ତବ୍ୟ ରଖିଥିଲେ।
ଏହି ଅବସରରେ ଭାଷାବିତ୍ ଦେବୀ ପ୍ରସନ୍ନ ପଟ୍ଟନାୟକଙ୍କୁ ଓଡ଼ିଆ ଭାଷା ପାଇଁ ତାଙ୍କର ଜୀବନବ୍ୟାପୀ ଅବଦାନ ହେତୁ ପ୍ରଥମ ବିଶ୍ବ ଓଡ଼ିଆ ଭାଷା ସମ୍ମାନ ପ୍ରଦାନ କରାଯାଇଥିଲା। ଏହି ପୁରସ୍କାର ସ୍ବରୂପ ଏକ ମାନପତ୍ର ଓ ୨୦ ଲକ୍ଷ ଟଙ୍କାର ପାରାତୋଷିକ ରାଶି ତା’ଙ୍କୁ ପ୍ରଦାନ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ବିଶିଷ୍ଟ କବି ସୀତାକାନ୍ତ ମହାପାତ୍ର ତଥା ସୁବିଦିତ ଲେଖିକା ପ୍ରତିଭା ରାୟଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା।
ଅଧିବେଶନର ପରବର୍ତ୍ତୀ ଭାଗରେ ପ୍ରଫେସର ଆର୍ଲୋ ଗ୍ରିଫିଥ୍ସ ସମ୍ମିଳନୀର ଆଭିମୁଖ୍ୟ ପ୍ରସଙ୍ଗରେ ନିଜର ତାତ୍ତ୍ବିକ ବ୍ୟାଖ୍ୟାନ ଉପସ୍ଥାପିତ କରିଥିଲେ।
ଏହି ସଭାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜର ପୂର୍ବ ପ୍ରସ୍ତୁତ ଲିଖିତ ଚିଠା ଦେଖି ଭାଷଣ ଦେଉଥିବା ବେଳେ କେତେକ ଓଡ଼ିଆ ଶବ୍ଦର ଅଶୁଦ୍ଧ ଉଚ୍ଚାରଣ କରୁଥିବା ଶୁଣାଯାଇଥିଲା, ଯେପରିକି ‘ସାର୍ଲା ଦାସ୍’ (ସାରଳା ଦାସ), ଓ ‘ଭବିଷ୍ୟୋତ୍’ (ଭବିଷ୍ୟତ) ଆଦି। ମଂଚର ଉପସ୍ଥାପିକାଙ୍କ ଓଡ଼ିଆ ଭାଷାରେ ମଧ୍ୟ ଅନେକ ଉଚ୍ଚାରଣଗତ ତ୍ରୁଟି ପରିଲକ୍ଷିତ ହୋଇଥିଲା; ଏପରିକି ସେ ‘କାନ୍ତକବି’ଙ୍କୁ ‘କଣ୍ଠକବି’ ବୋଲି କହିଥିଲେ। ମଂଚ ଉପରେ ଲାଗିଥିବା ବ୍ୟାନରରେ ଓଡ଼ିଶାର ବରପୁତ୍ରମାନଙ୍କର ସମ୍ମିଳିତ ଛବି ସମ୍ପନ୍ନ ଓଡ଼ିଶାର ମାନଚିତ୍ରଟି ଅପେକ୍ଷା ଓଡ଼ିଶାର ମୁଖ୍ୟମନ୍ତ୍ରୀଙ୍କ ଛବି ଅଧିକ ବଡ଼ ଆକାରରେ ପ୍ରଦର୍ଶିତ ହୋଇଥିଲା। ସଭାରେ ପ୍ରବେଶ ପାଇଁ ନିର୍ଦ୍ଧାରିତ ହୋଇଥିବା ରେଜିଷ୍ଟ୍ରେସନ ଫର୍ମ ଓଡ଼ିଆ ଭାଷାରେ ନ ହୋଇ ଇଂରାଜୀରେ ଲେଖାଯାଇଥିବାରୁ ଏହାର ପ୍ରତିବାଦ କରି ସମ୍ମିଳନୀର ରେଜିଷ୍ଟ୍ରେସନ୍ କେନ୍ଦ୍ରରେ ପ୍ରବଳ ଜନ-ଅସନ୍ତୋଷ ମଧ୍ୟ ଦେଖିବାକୁ ମିଳିଥିଲା। ସଭାସ୍ଥଳର ସାଉଣ୍ଡ୍ ପ୍ରଣାଳୀ ଉପଯୁକ୍ତ ମାନର ହୋଇନଥିବା କାରଣରୁ ମଂଚ ଉପରେ ବକ୍ତାମାନେ ଦେଉଥିବା ଭାଷଣ ଅନେକ ଉପସ୍ଥିତ ଶ୍ରୋତାଙ୍କ ପାଖରେ ପହଞ୍ଚିପାରିନଥିଲା ବୋଲି ମଧ୍ୟ ଅଭିଯୋଗ ହୋଇଛି।

17 thoughts on “ସାହିତ୍ୟ ଜଗତର ସମ୍ବାଦ

  1. ଅଶେଷ ଧନ୍ୟବାଦ ଓ ସମ୍ମାନ ଜଣାଉଛି

  2. ଖୁବ ସୁନ୍ଦର ପ୍ରୟାସ , ବହୁତ ବହୁତ ଧନ୍ୟବାଦ।

  3. ସାହିତ୍ୟ ସମାଚାର ମାଧ୍ୟମରେ ସାହିତ୍ୟ ବିଷୟରେ ତଥ୍ୟ ମିଳି ପାରୁଛି।

  4. ଓଡ଼ିଆ ଭାଷା ଓ ସାହିତ୍ୟର ପ୍ରଗତି କ୍ଷେତ୍ରରେ ଏହା ଏକ ମାଇଲଖୁଣ୍ଟ କହିଲେ ଅତ୍ୟୁକ୍ତି ହେବନାହିଁ।ସାହିତ୍ୟର ପ୍ରତିଟି ଖବର ଏଥିରେ ଦୃଶ୍ୟମାନ।

  5. ଖୁବ ଉପାଦେୟ, ଧନ୍ୟବାଦ ପ୍ରଣାମ |

  6. ବନ୍ଧୁଘର ସାହିତ୍ୟ ପିଣ୍ଡାର ଖବରଟି ଦେଖି ଖୁସି ହେଲି ବନ୍ଧୁ!💐

  7. ‘ସାହିତ୍ୟଚର୍ଚ୍ଚା’ ପରି ନିରୋଳା ସାହିତ୍ୟ ସଂପୃକ୍ତି ସମ୍ପ୍ରତି ବିରଳ! ନୂଆ ପରିକଳ୍ପନା ସହ ସାହିତ୍ୟର ଦୈନନ୍ଦିନୀକୁ ସାଉଁଟି ଆଣି ପାଠକଙ୍କ ପାଖରେ ରଖିବା କମ କଷ୍ଟକର ନୁହେଁ।
    ଏଥି ନିମନ୍ତେ ସଂପାଦକ ମହୋଦୟଙ୍କୁ ସାଧୁବାଦ ଜଣାଉଛି।

  8. ମୋତେ ଏହି ପୃଷ୍ଠାଟି ବହୁତ ଭଲ ଲାଗିଲା । ସାହିତ୍ୟ ଜଗତର ସବୁ ଖବର ଏଥିରେ ଗଚ୍ଛିତ । ଧନ୍ୟବାଦ ସାହିତ୍ୟ ଚର୍ଚ୍ଚା।

  9. ବିଜୟଲକ୍ଷ୍ମୀ ଆଚାର୍ଯ୍ୟ(ଗାଳ୍ପିକା,କବି,ପ୍ରାବନ୍ଧିକ ଓ ଶିଶୁ ସାହିତ୍ୟିକ) says:

    ଓଡ଼ିଆ ଭାଷା,ସାହିତ୍ୟ ବିଦେଶ ର ମାଟିରେ ବି ଓଡ଼ିଆ ର ସଂସ୍କାର ସଂସ୍କୃତିକୁ ଜୀବିତ କରିରଖିଛି। ଓଡ଼ିଆ ସାହିତ୍ୟର ନିଶ୍ଚିନ୍ତ ଜୟ ହୋଇଛି ।ଏହିପରି କାର୍ଯ୍ୟକ୍ରମ ଜାରି ରହୁ।

  10. ସାହିତ୍ୟ ଓ ସାହିତ୍ୟିକ ଉଭୟଙ୍କ ମନୋବଳକୁ ଏହା ଦ୍ବିଗୁଣିତ କରିବା ପାଇଁ ସହାୟକ ହେବ।

  11. ସୁଦୂର ପ୍ରାନ୍ତରେ ରହି ଓଡ଼ିଆ ସାହିତ୍ୟ ଜଗତର ଖବର ଜାଣିପାରୁଛୁ। ଅନେକ ତଥ୍ୟ ବିଷୟରେ ମଧ୍ୟ ଅବଗତ ହୋଇପାରୁଛୁ।
    ‘ସାହିତ୍ୟ ଚର୍ଚ୍ଚା’ର ସମସ୍ତ ବାର୍ତ୍ତାବାହକ ମାନଙ୍କୁ ଅଶେଷ ଅଶେଷ ଧନ୍ୟବାଦ।

  12. ପ୍ରଥମ ଭାଷା ସମ୍ମିଳନୀର ନିରପେକ୍ଷ ଖବର ପରିବେଷଣ ନିମନ୍ତେ ସାହିତ୍ୟ ଚର୍ଚ୍ଚା ପରିବାରକୁ ସାଧୁବାଦ ଜଣାଉଛି। ତ୍ରୁଟିପୂର୍ଣ୍ଣ ସମ୍ଭାଷଣ ହିଁ ଆମ ଭାଷା ଅବକ୍ଷୟର ପ୍ରମୁଖ କାରଣ, ଏଥି ପ୍ରତି ସାଧାରଣ ସ୍ତରରେ ଚେତନା ଜାଗୃତି କ୍ଷେତ୍ରରେ ପତ୍ରିକାଟି ଗୁରୁତ୍ବପୂର୍ଣ୍ଣ ଭୂମିକା ନେଉ ଏ ଆଶା ପୋଷଣ କରୁଛି ।

  13. ଖୁବ୍ ଉପାଦେୟ ତଥ୍ଯ ପୋଷ୍ଟ କରାଯାଇଛି ସାର୍— ଧନ୍ୟବାଦ🙏

  14. ବେଶ୍ ଉପାଦେୟ ଆଲେଖ୍ୟ ସବୁ, ଅଶେଷ ଅଭିନନ୍ଦନ

  15. ଓଡିଆରେ ଏପରି ନିରୋଳା ସାହିତ୍ୟ ସମାଚାର ପତ୍ରିକାଖଣ୍ଡେ ଦରକାରଥିଲା ତାହା ପୂରଣ କରିଛି “ସାହିତ୍ୟ ଚର୍ଚ୍ଚା”
    ପ୍ରକାଶକଙ୍କୁ ଅଭିନନ୍ଦନ

Leave a Reply

Your email address will not be published. Required fields are marked *